BQO-da otbasylyq-turmystyq qatynastar salasyndaǵy qylmys sany 8 esege kóbeıgen
ORAL. KAZINFORM — Batys Qazaqstan oblysynda bıylǵy bes aıda otbasy-turmystyq qatynastar salasynda 75 qylmys tirkeldi.
BQO polıtsııa departamentiniń bastyǵy, polıtsııa polkovnıgi Arman Orazalıevtiń málim etkenindeı, bul — ótken jylǵy osy kezeńdegiden (9) 8 esege kóp.
Onyń aıtýynsha, munyń sebebi — 2024 jylǵy shildeden bastap uryp-soǵý (bıyl osyndaı 51 qylmys esepke ilikken) jáne densaýlyqqa qasaqana jeńil zııan keltirýdiń (19) ákimshilik jazadan qylmystyq jazaǵa aýystyrylǵandyǵy.
— Prezıdentimiz otbasy-turmystyq qatynastar salasyndaǵy qylmysqa aıryqsha nazar aýdaryp otyrǵany málim. Osy oraıda polıtsııa departamentiniń áıelderdi zorlyq-zombylyqtan qorǵaý bólinisine qosymsha 35 shtat berildi. Turmystyq quqyq buzýǵa adamdar kóbinese mas kúıinde barady. Jyl basynan beri osyndaı 26 qylmys (2024 jyly bes aıda — 3) jasaldy, — dedi Arman Orazalıev.
Departament bastyǵynyń sózine qaraǵanda, óńirde profılaktıkalyq maqsatta is-sharalar atqarylyp jatyr. Aıtalyq, ýaqytsha beıimdeý jáne ýytsyzdandyrý ortalyǵynda mas kúıinde 6 736 adam (2024 jyly — 5 815) jetkizilip, sonyń 4 207-si (3 505) aıyqtyrýǵa ornalastyryldy.
Arnaıy emdeý mekemesinde májbúrlep emdeýge 83 azamat (81) rásimdeldi. Sondaı-aq alkogoldi ishimdikti ishkeni jáne qoǵamdyq oryndarda mas kúıinde júrgeni úshin 3 671 quqyq buzýshy (3 707) ákimshilik jaýapkershilikke tartyldy.
Departament málimetine sáıkes jýyrda «Alkogol» jedel aldyn alý is-sharasy barysynda Oral qalasynyń eki turǵyny ustalyp, avtokóligin tintý kezinde aktsızsiz 170 lıtr sýrrogattyq alkogoldi ónim tárkilendi. Qazirgi kezde kúdiktilerdi ákimshilik jaýapkershilikke tartý úshin (282-bap) Oral qalalyq sanıtarlyq-epıdemıologııalyq basqarmasyna materıal joldandy.
— Bıylǵy 1 qyrkúıekten bastap ákimshilik jazanyń jańa túri — qoǵamdyq jumystar engiziledi, sonyń ishinde otbasylyq-turmystyq saladaǵy zańǵa qaıshy áreketter (73-bap) úshin. Turmystyq zorlyq-zombylyq qurbandaryna kómek kórsetý maqsatynda Oral jáne Aqsaı qalasynda eki daǵdarys ortalyǵymen birlesip jumys istep kelemiz. Olarǵa 99 áıel kómek surap júgindi, sonyń ishinde 14-i polıtsııa qyzmetkerleriniń joldamasy boıynsha ortalyqtarǵa ornalastyryldy, — dedi Arman Orazalıev.
Eske sala keteıik, budan buryn Batys Qazaqstanda jasóspirimderge qatysty qylmystyń 75 paıyzǵa ósip otyrǵanyn jazǵan bolatynbyz.