BQO-da ósimdik sharýashylyǵyn qoldaýǵa 1 mlrd teńgeden astam qarjy bólindi
ORAL. QazAqparat - Batys Qazaqstan oblysynda bıyl 513,5 myń gektarǵa aýyl sharýashylyǵy daqyldary egilmek. Bul týraly óńirlik kommýnıkatsııalar qyzmetinde BQO aýyl sharýashylyǵy basqarmasy basshysynyń orynbasary Satqan Ómirzaqov málim etti, dep habarlaıdy QazAqparat tilshisi.
Onyń aıtýynsha, bul - ótken jylǵydan 491,7 myń gektarǵa artyq. Osynyń basym kópshiligi nemese 259 myń gektary - dándi daqyldar. Maıly daqyldar 61 myń gektarǵa sebiletin bolsa, sonyń ishinde kúnbaǵysty 48 myń gektarǵa (ótken jyly - 42,8 myń ga) jetkizý kózdelýde. Sondaı-aq kartop jáne kókónis, baý-baqsha daqyldary 9500 ga alqapqa egilmek.
Basqarma basshysy orynbasarynyń sózine qaraǵanda, kóktemgi dalalyq jumystarǵa 630-ǵa jýyq jeke sharýashylyq qatysady. Kúni búgin dalalyq jumystarǵa 4215 traktor, 4965 tuqym sepkish, 811 kýltıvator jáne «Djon Dır», «Fleksıkoıl», «Keıs», «Horsh» markaly ónimdiligi joǵary egis keshenderi daıyn tur (tehnıkalardyń ázirligi - 98 paıyz)
Oblysta kóktemgi dalalyq jumystardy júrgizýge 12 myń tonna dızel otyny qajet (sáýir - 5 myń tonna, mamyr - 7 myń tonna). Otynnyń qajetti mólsheri bólinip, «Batys Arna» JShS dızel otynyn jetkizýshi operator retinde anyqtaldy. Dızel otynynyń baǵasy lıtrine 141 teńge. Qazirgi tańda taýar óndirýshiler men «Batys Arna» JShS arasynda kelisimshart jasalýda.
«Eger dándi daqyldardyń tuqymy týraly aıtatyn bolsaq, oblysta 23,5 myń tonna jazdyq daqyldar tuqymy ázirlendi, ol qajettiliktiń 113,3 paıyzyn quraıdy. Óńirde joǵary reprodýktsııaly tuqym óndirýmen bir elıtalyq tuqym sharýashylyǵy jáne bes tuqym sharýashylyǵy aınalysýda. Olar 6,8 myń tonna tuqym óndirip, 3,5 myń joǵary sapaly aýdandastyrylǵan dándi daqyldar sorttaryn satýǵa ázir otyr (sonyń ishinde jazdyq bıdaı - 2800 tonna, arpa - 428 tonna, suly - 63 tonna). Maıly daqyldardyń tuqymdaryna suranys 500 tonna, sharýashylyqtar 725 tonna tuqymdy ázirlep, satyp aldy (145 paıyz)», - dedi S.Ómirzaqov.
«Tuqym sharýashylyǵyn damytýdy sýbsıdııalaý» baǵdarlamasy aıasynda 2018 jyly 192,4 mln. teńge bólindi. Sýbsıdııalar aýyl sharýashylyǵy taýar óndirýshileriniń, tuqym sharýashylyqtarynyń shyǵyndaryn ishinara azaıtýdy kózdeıdi. Atalǵan baǵdarlamaǵa sáıkes aýdandastyrylǵan tuqym sorttaryn satyp alý shyǵyndarynyń 70 paıyzyn, aýdandastyrylmaǵan tuqym sorttaryn satyp alý shyǵyndarynyń 30 paıyzyn sýbsıdııalaý qarastyrylǵan.
Sol sekildi oblys sharýashylyqtary 1358 tonna mıneraldy tyńaıtqyshtarǵa tapsyrys berdi (2017 jyly - 1264 tonna). Qazirgi tańda ol tyńaıtqysh óndiriletin zaýyttarda tıelý ústinde.
Memleket tarapynan agrotehnıkalyq jumystardy sapaly atqarýǵa barlyq qajetti jaǵdaılar jasalýda. Bıyl ósimdik sharýashylyǵy salasyn qoldaýǵa sýbsıdııa túrinde 1 mlrd astam teńge bólindi.
Bir aıta ketetin jaıt, qazirgi tańda búkil elimiz boıynsha alqaptardy elektrondyq formatqa kóshirý jumystary júrgizilýde. Bul jumystar 2018 jyldyń 1 shildesine deıin aıaqtalýy tıis. Alqaptardy elektrondyq formatqa kóshirý arqyly aýyl sharýashylyǵy jumystaryna bólinetin dızel otynyn ádiletti bólý tetikteri aıqyndalady. Sonymen qatar portaldyń kómegi arqyly operator men sharýalar arasynda dızel otynyn on-line satýǵa jáne satyp alýǵa jol ashylady jáne ol elektrondy kelisimshart arqyly júredi.
Kóktemgi dalalyq jumystardy qarjylandyrý «Agrarlyq nesıe korporatsııasy» AQ-nyń «Keń dala» jáne «Aýyl sharýashylyǵyn qarjylaı qoldaý qory» AQ-nyń «Eginjaı» baǵdarlamalary arqyly júrgizilýde.
