BQO-da órtten kelgen shyǵyn 9 mln teńgeden asty
ORAL. QazAqparat - Batys Qazaqstan oblysynda bıylǵy birinshi jartyjyldyqta 278 órt tirkeldi. Bul týraly BQO TJ departamenti órt qaýipsizdigi salasyndaǵy baqylaý jáne aldyn alý qyzmeti basqarmasy bastyǵynyń orynbasary, azamattyq qorǵaý maıory Amangeldi Eshmuhanov málim etti, dep habarlaıdy «QazAqparat» tilshisi.
Onyń aıtýynsha, osy kezeńde órtten kelgen shyǵyn 9 mln teńgeden asty. Órt saldarynan 4 adam qaza taýyp, 10-y túrli jaraqat aldy. Órttiń basym bóligi (190-y) turǵyn úı sektorynda oryn aldy.
Jaz shyǵa órt qaýpi kúsheıetini belgili. Osyǵan oraı oqys oqıǵalardyń aldyn alý maqsatynda tıisti sharalar alynýda.
Sol sekildi adamdardyń sýǵa ketýin boldyrmaý baǵytynda da jumystar jasalýda. BQO TJ departamenti jedel qutqarý jasaǵy súńgýirlik-qutqarý qyzmetiniń basshysy Alekseı Eremeevtiń sózine qaraǵanda, sýǵa túsý maýsymy bastalǵannan beri adamdar jıi shomylatyn ózen jaǵalaýlarynda qaýipsizdik beketteri jumys jasaýda. Sonyń nátıjesinde on adam qutqarylsa, sonyń beseýi - balalar. Ókinishke qaraı, eki adam sýǵa ketti. Ótken jyly osy merzimde 7 adam sýdan shyqpaı qalǵan bolatyn. Adamdardyń sýǵa ketýine olardyń qaýipsizdik erejelerin saqtamaýy, júzý bilmeýi, mas kúıinde túsýi áser etýde.
