BQO-da órtten qaza bolǵandar sany 2,6 esege kóbeıip otyr
ORAL. KAZINFORM — Batys Qazaqstan oblysynda jyl basynan beri 658 órt oqıǵasy tirkeldi.
BQO TJD memlekettik órt baqylaý basqarmasynyń bastyǵy Mereke Jumaǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, sony saldarynan 13 adam qaza taýyp, úsheýi túrli jaraqat aldy. Órtten keltirilgen shyǵyn kólemi 32 mln 248 myń teńgeden asty.
Mereke Baýyrjanulynyń sózine qaraǵanda, ótken jyldyń osy kezeńimen salystyrǵanda, órt sany 8,4 paıyzǵa (2024 jyly – 718) azaıǵanymen, qaza bolǵandar sany 2,6 esege (5-ten 13-ke) kóbeıip otyr. Jaraqat alǵandar 72,8 paıyzǵa (11-den 3-ke) azaıǵany baıqalady.
Turǵyn úı sektorynda 379 órt boldy, bul ótken jylǵydan (414) 8,5 paıyzǵa az.
- Órttiń aldyn alý baǵytynda júrgizilip jatqan reıdtik is-sharalar barysynda halyqtyń áleýmettik osal toptaryna jatatyn otbasylarǵa erekshe nazar aýdarylýda. Qazirgi ýaqytta departament esebinde atalǵan sanattaǵy 778 otbasy bar. Departament qyzmetkerleri jergilikte atqarýshy organdarmen birlesip, osy otbasylar turatyn turǵyn úılerdi túgel aralap shyqty.
Nátıjesinde 653 ýly gaz datchıgi ornatylyp, olardyń 83,9 paıyzy qamtyldy. Ótken jyly 629 otbasy esepke alynyp, olardyń turǵyn úılerine datchıkter túgeldeı ornatylǵan bolatyn, - dedi M.Jumaǵalıev.
Eske sala keteıik, budan buryn Oralda gazdan ýlanǵan ana men 5 balanyń aýrýhanaǵa jatqyzylǵanyn jazǵan bolatynbyz.