BQO-da órtten eki adamdy qutqarǵan oqýshy marapattaldy
ORAL. QazAqparat - Batys Qazaqstan oblysy Aqjaıyq aýdanyndaǵy Q.Baısyqov atyndaǵy mekteptiń 11-synyp oqýshysy «Órttegi erligi úshin» medalimen marapattaldy, dep habarlaıdy QazAqparat tilshisi.
25 aqpan kúni janyp jatqan úıden 8 jasar ul bala men er adamdy alyp shyqqan Mıras Júnisovke medaldi BQO Tótenshe jaǵdaılar departamentiniń bastyǵy Jasulan Jumashev tapsyrdy.
Sondaı-aq oqýshynyń ata-anasyna QR Іshki ister mınıstriniń, synyp jetekshisine TJD bastyǵynyń alǵys hattary tabys etildi.
Buǵan deıin habarlaǵanymyzdaı, Mıras Júnisov sabaqtan kele jatqanda, kórshi úıdiń terezesinen jalyndy baıqaǵan. Úıdiń ishine kirgenmen, qoıý tútinnen eshteńe kóre almaǵan. Órtke qarsy qyzmetke habarlasý úshin qaıta shyǵyp bara jatqan kezde balanyń daýysyn estigen. Úıdiń ishine kirip, balany alyp shyqqan. Qorqyp qalǵan bala taǵy kim bar ekendigin aıta almaǵan. Sol mezgilde er adamnyń jótelgen daýysy shyqqan. Oqýshy bala onyń da syrtqa shyǵyp, kórshi úıge jetýine járdemdesken. Keıin órtpen kúres bólimine habar berilgen.
Mıras Medetuly oqý ozaty, «Altyn belgiden» úmitker. Geografııa páninen aýdandyq olımpıadanyń ekinshi oryn ıegeri, oblystyq «Erýdıt» baıqaýynyń júldegeri.
