BQO-da órtten bes balanyń qaza tabýyna baılanysty qylmystyq is qozǵaldy
ORAL. KAZINFORM — Batys Qazaqstan oblysy Syrym aýdany ortalyǵy Jympıty aýylynda turǵyn úıdegi órtten bes balanyń kóz jumý deregi boıynsha tergeý amaldary júrgizilip jatyr.
BQO Polıtsııa departamentiniń baspasóz qyzmetinen málim etkenindeı, oqıǵaǵa baılanysty qylmystyq is qozǵaldy.
- Aldyn ala málimet boıynsha balalar ýly gazdan qaıtys bolǵan. Tergeý amaldary barysynda oqıǵanyń barlyq mán-jaıy anyqtalady, - dep habarlady vedomstvodan.
Batys Qazaqstan oblysynyń ákimi Narıman Tóreǵalıev Syrym aýdanynda qaza tapqan balalardyń ata-anasy men týystaryna qaıǵylaryna ortaqtasyp, kóńil aıtty.
- Ákimdik tarapynan jerleý rásimin uıymdastyrý, psıhologııalyq kómek kórsetý, baspanamen qamtamasyz etý jáne basqa da qajetti kómek kórsetiledi. Oqıǵa ornynda TJD mamandary, polıtsııa departamenti men medıtsına qyzmetkerleri jáne ózge de tıisti qyzmet ókilderi jumys istep jatyr. Jaǵdaı jiti baqylaýda, - dedi óńir basshysy.
Eske sala keteıik, budan buryn Batys Qazaqstanda órtten bir otbasynan bes balanyń kóz jumǵanyn jazǵan bolatynbyz.