BQO-da órt sóndirý kezinde qutqarýshy qaza tapty
ORAL. KAZINFORM — Oqıǵa Taý aýyldyq okrýginiń aýmaǵynda boldy. Órt sóndirý bóliminiń vzvod komandıri Mırshat Halıýllın kóliktiń astynda qalyp qoıǵan. Kólikti áriptesi júrgizgen.
BQO Jánibek aýdany Taý aýyldyq okrýgi aýmaǵyndaǵy órt 3-qyrkúıek kúni boldy. Alaıda órt sóndirýshiniń qazasy týraly aqparat tek týystarynyń jazbasy kezinde ǵana aıtyla bastady. Áleýmettik jeli qoldanýshysy ári marqum Mırshat Halıýllınniń týysy Altaı Baqtyǵalıevtiń jazbasyna súıensek, Órt sóndirý bóliminiń vzvod komandıri Mırshat Marsuly Halıýllın qyzmet babynda qaza tapty.
— Arnaıy oqý ornyn támamdap, Otan aldyndaǵy azamattyq boryshyn abyroımen ótedi. Uzynkól aýyldyq okrýgi ákimi apparatynyń statıst qyzmetin atqardy. Odan keıin aýdandyq órt sóndirý bólimine jumysqa ornalasyp, ómiriniń sońǵy sátine deıin óz mindetine adaldyqpen qyzmet etti. Mırshattyń minezi qarapaıym, júregi taza, adamǵa jamandyq oılamaıtyn, aınalasyna syıly azamat edi. Ol óziniń adamgershiligimen, eńbekqorlyǵymen jáne qarapaıym bolmysymen kópshiliktiń esinde qaldy. Órt sóndirýshi — jaı ǵana maman emes. Ol ózgeler qaýipten qashqan sátte, qaýiptiń ishine kiretin adam. Óz ómirin qaterge tigip, ózgeniń ómiri men dúnıe-múlkin, tabıǵatty, eldi mekenderdi qorǵaý — onyń kúndelikti qyzmeti. Marqum Mırshat ta sol mindetin atqaryp júrip ómirden ótti. Ol óziniń jeke múlkin emes, elimizdiń keń baıtaq jerin órtten qorǵaýǵa shyqty. Óziniń amandyǵyn emes, halyqtyń qaýipsizdigin oılap qyzmet etti. Sondyqtan onyń qazasyn «bir jas jigittiń qaıǵyly ólimi» dep qana qabyldaýǵa bolmaıdy. Onyń el úshin atqarǵan qyzmeti men erligi umytylmaýy kerek, — dep jazdy ol.
Kazinform tilshisi marqum Mırshat Halıýllınniń ákesi Mars Halıollaulymen habarlasty. Marqumnyń ákesi oqıǵanyń qalaı bolǵanyn baıandap berdi.
— Meniń balam qolymda turdy, úıdiń asyraýshysy edi. Ol órt sóndirý qyzmetindegi jumysyn 2016 jyly bastady. Ózim oqıǵanyń qalaı bolǵanyn bilmeımin, biraq mán-jaıdy áriptesteri aıtyp berdi. Taý aýyly mańynda órt bolǵan. Bul týraly ol kezekshilikke túskende bilip, dalalyqqa barady. Órt sóndirý kóliginiń rýlinde ózimen teteles bala, birge oınap, birge júrgen áriptesi boldy. Ekeýi birge oqyǵan, birge jumysqa turdy. Órt sóndirý jumystary kezinde áriptesi abaısyzda kóligimen basyp ketken. Júrgizýshi tútin kezinde kórmeı qalǵanyn aıtyp otyr. Aınalany qarap kele jatqan, bir qaraǵanda kórgen, keıin baıqamaǵan. Keshirim surady. TJD ókilderi kelip kóńil aıtty, kómegin usyndy, — dedi Mars Halıollauly. Onyń aıtýynsha, balasy aýrýhanaǵa jetpeı kóz jumdy. Mırshat Marsuly otbasynda úsh balanyń úlkeni. Odan keıin inisi men qaryndasy bar. Anasy erterekte kóz jumdy.
Batys Qazaqstan oblystyq polıtsııa departamenti bul oqıǵaǵa qatysty qandaı da aqparat taratpaı otyr. Kazinform TJM saýal joldady.
— Áriptesimiz qyzmettik boryshyn óteý kezinde qaıtys bolǵan. Barlyq qajetti kómek berildi. Bizdiń árbir qyzmetker qashanda mınıstrliktiń baqylaýynda. Erlikpen qaza tapqan árbir qyzmetkerdiń esimi máńgi saqtalady jáne árqaısyna árqashanda kóńil bólinip, olardyń erligi úlgi bolyp qalady, — dep habarlady TJM baspasóz qyzmeti.
Eske salsaq, ShQO-da pyshyq jaraqatynan órt sóndirýgi qaza tapty. Áriptesteri polıtsııaǵa nemese jedel járdemge habar bermeı, ony aýrýhanaǵa ózderi jetkizgen. Qylmystyq is sotqa jiberildi.
