BQO-da órt sóndirýshiler eki adamdy qutqardy
ORAL. QazAqparat - 5 aqpan kúni saǵat 04.58-de BQO TJ departamenti órt sóndirý jáne apattyq-qutqarý jumystary qyzmetiniń №8 bólimine Aqsaı qalasynda Trýdovaıa kóshesi 81-úıdiń tóbesi janyp jatqany jóninde habar túsken, dep habarlaıdy «QazAqparat» HAA tilshisi.
BQO TJ departamenti órt sóndirý jáne apattyq-qutqarý jumystary qyzmetinen túsken málimetke qaraǵanda, órt týraly kórshiler habarlaǵan. Órt sóndirýge 2 tehnıka, 5 adam qatystyryldy. Oqıǵa ornyn barlaý kezinde úıde uıyqtap jatqan 1991 jáne 1994 jylǵy azamattar tabylyp, qutqaryldy. Órt saǵat 08.25-te tolyqtaı sóndirildi, zardap shekkender joq. Órt aýmaǵy 70 sharshy metrdi qamtydy.
Sońǵy kúnderi óńirde birneshe órt oqıǵalary oryn aldy. Qazirgi kezde olardyń sebep-saldary, keltirilgen shyǵyn, kináli adamdar anyqtalýda.
Aıta keteıik, oblysta jyl basynan beri 58 órt, 23 janý oqıǵasy tirkeldi.
