BQO-da órt sóndirýshi 1 mln teńge taýyp alyp, ıesine qaıtaryp berdi
ORAL. QazAqparat - Batys Qazaqstan oblysynda órt sóndirýshi 1 mln teńge taýyp alyp, ıesine qaıtaryp berdi, dep habarlaıdy «QazAqparat» tilshisi.
BQO TJ departamentiniń baspasóz qyzmetinen alynǵan málimetke qaraǵanda, Tasqala aýdany №13 órt sóndirý bóliminiń qyzmetkeri, azamattyq qorǵaý aǵa serjanty Amanbaı Najmıddınov keshkisin týysqandaryna bara jatqan kezde aýdandyq meshittiń janynan ámııan taýyp alǵan.
-Jerden ámııandy kóterip, ıesiniń baılanys málimetterin izdeı bastadym. Baıqaǵanymdaı, onda iri kólemde aqsha, jeke kýálik, sheteldik pasport pen basqa zattar jatyr. Sodan soń qaltama saldym da, týystaryma jol tarttym, onda bolǵan jaıtty aıtyp, ıesin tanıtyn-tanymaıtyndaryn suradym. Keıinnen ámııannan ıesiniń telefon nómirin taýyp alyp, tapqan oljam týraly aıttym. Kelesi kúni ol kelip, ámııanyn alyp, maǵan alǵysyn bildirip ketti, - deıdi A.Najmıddınov.
Keıin anyqtalǵanyndaı, ámııan ıegeri Іlııas Sarıev bolyp shyqty, ol Taskala aýdanynyń týmasy eken, Reseı Federatsııasynyń Tobolsk qalasynda qyzmette. Amanbaıdyń sózinshe, ámııanda tek Іlııastyń aqshasy emes, óz otbasynan jyraqta júrip, nápaqasyn taýyp júrgen birneshe adamnyń jalaqysy da bolǵan eken.
Ótken jylǵy 16 jeltoqsan kúni bolǵan bul oqıǵa týraly kópshilik Tasqala aýdany tótenshe jaǵdaılar bólimine Іlııas Sarıevtiń jubaıy Janna kelip, BQO TJD bastyǵy, general-maıor Jasulan Jumashevtyń atyna №13 órt sóndirý bóliminiń órt sóndirýshisi Amanbaı Najmıddınovty marapattaý jóninde alǵyshatyn jazbaǵanda ,bálkim, bilmes te edi. Sonymen qosa ol basshylyqqa jas qyzmetkerlerdi adamgershilik qasıetke tárbıelep júrgenderi úshin alǵysyn bildirdi.
Osyǵan baılanysty BQO TJD basshylyǵy A.Najmıddınovty marapattaý jóninde sheshim qabyldady.
