BQO-da órt oqıǵalary báseńsimeı tur
ORAL. QazAqparat - Aqjaıyq aýdanynda órt oqıǵalary kóbeıip tur. Bul týraly áleýmettik jelidegi paraqshasynda aýdan ákimi Ádil Jolamanov málim etti, dep habarlaıdy «QazAqparat» tilshisi.
Onyń aıtýynsha, juma kúni Qaztalov aýdanynyń Taldyqudyq eldi mekeni jaǵynan shyqqan órt keshe tańda Aqjaıyqtyń Alǵabas, Qabyrshaqty, Jańabulaq, Jambyl aýyldaryna jetti.
«Jeldiń kúshtiliginen jáne uıytqı soǵýynan órtti birden sóndirý múmkin bolmady. Kesheden bergi órttiń qalǵany qazirgi ýaqytta Jambyl aýyldyq okrýgine qarasty Úshtóbe eldi mekeni tusynda sóndirilýde. Adam, mal jáne tehnıka shyǵyny joq. «Tilsiz jaý» jergilikti turǵyndar men erikti órt sóndirýshiler jasaqtarynyń kúshimen aýyzdyqtalýda. Budan basqa Mergen, Aqjol aýyldyq okrýgteriniń aýmaǵyndaǵy buryn basylǵan orman órtteri qaıtadan jalǵasýda. Ol jaqta da úsh órt sóndirý mashınalary men orman sharýashylyǵy mekemeleriniń tehnıkalary jumyldyryldy. Júzge tarta azamattar tartyldy. Ókinishke qaraı, sharýa qojalyqtarynyń biraz shóbi janyp ketti. Órtke qarsy is-qımyl el azamattary men turǵyndary arasynda uıymshyldyq pen birliktiń qanshalyqty mańyzdy ekendigin taǵy bir kórsetti», dedi Á.Jolamanov.
Eske sala keteıik, budan buryn 30 shilde kúni osy aýdannyń Bazarsholan jáne Bazartóbe aýyldyq okrýgterinde órt bolyp, shabyndyq jáne jaıylymdyq jerler otqa oranǵan bolatyn. Al Qaztalov aýdany Taldyapan aýyldyq okrýginde bolǵan órtten 600-ge jýyq ýaq jandyq janyp ketip, 1990 jylǵy turǵyn kóz jumdy. Órt oqıǵalary basqa da aýdandarda oryn alýda. Osyǵan baılanysty Aqjaıyq, Qaztalov aýdandary men Bókeı ordasynyń Saıqyn aýyldyq okrýginde tótenshe jaǵdaı jarııalanǵan edi.
