BQO-da órt kezinde qaza tapqan 9 adamnyń jeteýi mas kúıinde bolǵan

ORAL. KAZINFORM — Batys Qazaqstan oblysynda jyl basynan beri 123 órt tirkelip, sonyń saldarynan 9 adam kóz jumyp, taǵy ekeýi jaraqat aldy.

BQO TJD bastyǵynyń orynbasary Eldos Battalovtyń málim etkenindeı, ótken jyldyń osy kezeńimen salystyrǵanda, órt sany 14-ke, mert bolǵandar 8, jaraqat alǵandar 1 adamǵa kóbeıip ketip otyr.

Eldos Nurlanulynyń sózine qaraǵanda, órttiń shyǵýyna azamattardyń qarapaıym órt qaýipsizdigi erejelerin saqtamaýy sebep bolyp otyr. Atap aıtqanda, temegi shegý kezindegi abaısyzdyqtan 6, pesh jaǵýda órt qaýipsizdigi erejelerin saqtamaýdan 3 órt shyqqan. Qaza tapqan toǵyz adamnyń jeteýi mas kúıinde bolǵany anyqtaldy.

— 15 naýryz kúni Oral qalasynda H.Chýrın kóshesindegi jataqhanada órt boldy. Odan 40 adam óz betimen evakýatsııalansa, sonyń beseýi — balalar. Órtti sóndirý barysynda gazben ýlaný belgileri bar 1969 jylǵy er adamnyń máıiti tabyldy. Órt tósekte temeki shegýden bastalǵan. «Tilsiz jaýdy» aýyzdyqtaýǵa departamentten 18 adam men 7 tehnıka jumyldyryldy. Tótenshe jaǵdaılar departamenti oblys turǵyndary men qonaqtaryn qarapaıym órt qaýipsizdigi erejelerin qatań saqtaý kerektigin eske salady. Elektr qurylǵylarynyń jaramdylyǵyn qadaǵalap, elektr jelilerine shamadan tys júkteme túsirmeý mańyzdy. Peshti qaraýsyz qaldyrmaý jáne turǵyn úıde, ásirese, mas kúıde temeki shekpeý qajet, — dedi E.Battalov.

Eske sala keteıik, budan buryn BQO-da turǵyn úıde edenniń astynan jylandar shyqqanyn jazǵan bolatynbyz.