BQO-da órt qaýipsizdigi talaptaryn buzǵandarǵa 2,9 mln astam teńge aıyppul salyndy
ORAL. KAZINFORM — Batys Qazaqstan oblysynda jyl basynan beri 1 717,2 gektardy (2025 jylǵy osy merzimde — 3 254,8 ga) qamtyǵan 25 tabıǵı órt (18) tirkeldi.
BQO TJ departamenti bastyǵynyń orynbasary Eldos Battalovtyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde 147,2 gektardy (2025 jyly osy kezeńde –104,8 ga) sharpyǵan orman órti, 1 570 ga (3 150 ga) 4 dala órti (6), 3 934 ga (2 930 ga) 159 dalalyq janý (118) boldy.
Eldos Nurlanulynyń sózine qaraǵanda, saldarynan 3 mln 202,4 myń teńge materıaldyq shyǵyn keltirildi, bul ótken jylǵydan (2 mln 183,1 myń teńge) kóp.
— Ótken jyldyń sáıkes kezeńimen salystyrǵanda, tabıǵı órtterdiń sany óskenimen, olardyń janý aýmaǵy 47 paıyzǵa tómendedi. Al ormandaǵy órt eki esege artty. Esesine dala órtteri 33,3 paıyzǵa azaıyp, jalyn sharpyǵan olardyń jalpy aýmaǵy 50,2 paıyzǵa qysqardy, — dedi E.Battalov.
Onyń aıtýynsha, tabıǵı órtterdi erte anyqtaý maqsatynda orman alqaptarynda ornatylǵan 10 beınebaqylaý kamerasy paıdalanylyp, «Qazaqstan ǵarysh sapary» júıesi arqyly táýlik boıy ǵaryshtyq monıtorıng júrgizildi. Sonymen qatar orman alqaptarynda áýeden patrýldeý uıymdastyrylyp, órt qaýpi kúsheıgen kezeńde departamenttiń mehanıkalandyrylǵan kezekshilik toptary jumyldyryldy.
Departament málimeti boıynsha azamattyq qorǵaý, polıtsııa, orman sharýashylyǵy jáne jergilikti atqarýshy organdardyń qatysýymen qurylǵan mobıldi toptar oblys aýmaǵynda 1 502 reıd ótkizdi. Nátıjesinde órt qaýipsizdigi talaptaryn buzǵan 603 tulǵa ákimshilik jaýapkershilikke tartylyp, olarǵa 2,9 mln astam teńge aıyppul salyndy.
Eske sala keteıik, budan buryn Batys Qazaqstanda ormandaǵy órtti sóndirýge tikushaq tartylǵanyn jazǵan edik.
Sondaı-aq Oral qalasynda han toǵaıy otqa orandy.
