BQO-da órt qaýipsizdigi talaptaryn buzǵan 600-ge jýyq adamǵa aıyppul salyndy
ORAL. KAZINFORM – Batys Qazaqstan oblysynda jyl basynan beri 311 órt oqıǵasy tirkeldi.
BQO TJ departamenti bastyǵynyń orynbasary Eldos Battalovtyń óńirlik kommýnıkatsııalar qyzmeti alańynda ótken brıfıngte málim etkenindeı, bul ótken jylǵy sáıkes kezeńmen salystyrǵanda (270) 15,1 paıyzǵa artyq.
Eldos Nurlanulynyń sózine qaraǵanda, órt saldarynan 4 adam (2024 jyly osy kezeńde – 3) qaza taýyp, bireýi (6) jaraqat aldy. Keltirilgen shyǵyn 29 mln 348 myń teńgeden asty.
- Turǵyn úı sektorynda 166 órt bolyp, bul da ótken jylǵydan (156) 6,4 paıyzǵa kóbeıip otyr. Sondaı-aq oblys aýmaǵynda jalpy aýdany 15,7 gektar 2 orman órti jáne 413,5 gektar 55 daladaǵy janý tirkeldi. Ótken jyly osy kezeńde tek 1 tabıǵı órt oqıǵasy bolǵan edi, - dedi E.Battalov.
Onyń aıtýynsha, departament jasaǵynda 186 tehnıka bar. Oǵan qosa jeke quram órt ornyna 9 tehnıkamen (2 avtobýs, 7 vahtalyq kólik) jedel jete alady. Órt sóndirýge tartylǵan kúshtermen radıobaılanys ornatý úshin komandalyq-shtabtyq mashına paıdalanylady, ol barlyq iri tabıǵı órtterge tartylatyn bolady.
- Oblysta quramynda 84 adamy bar 15 mobıldik top jumys isteıdi. Kúni búginge deıin 567 reıdtik is-shara ótkizilip, sonyń barysynda órt qaýipsizdigi talaptaryn buzǵany úshin 599 adam ákimshilik jaýapkershilikke tartylyp, olarǵa 3 mln 322,990 myń teńge aıyppul salyndy, - dedi departament bastyǵynyń orynbasary.
Eske sala keteıik, budan buryn BQO-da júk kóliginiń poıyzben soqtyǵysýyna baılanysty TJ departamenti túsinik bergenin jazǵan edik.