BQO-da órt qaýipsizdigi erejesin buzǵan 117 adam jaýapqa tartyldy
ORAL. QazAqparat – Batys Qazaqstan oblysynda órt qaýipsizdigi erejelerin buzǵany úshin 117 adam ákimshilik jaýapkershilikke tartyldy, dep habarlaıdy QazAqparat tilshisi.
BQO TJ departamentiniń bas mamany Mereke Jumaǵalıevtiń aıtýynsha, bul turǵyndar qoqystardy órteý jáne ot jaǵý kezinde abaı bolmaǵany úshin jazalandy.
Óńirde órt shyǵý qaýpi kúsheıgennen beri 1141 gektardy qamtyǵan 3 orman órti, sondaı-aq tabıǵı janýlar tirkeldi. Munyń negizgi sebepteri – turǵyndardyń otpen abaı bolmaýy jáne qurǵaq shópti ruqsatsyz jaǵý.
«Qazirgi tańda karantındik shekteý sharalarynyń birtindep alynýyna baılanysty adamdar tabıǵatqa jappaı shyǵa bastady. Mine, osy kezde órt qaýipsizdigi talaptaryn saqtaýdyń mańyzy zor. Ereje buzýshylyqtyń jolyn kesý maqsatynda BQO TJ departamenti men polıtsııa departamenti jergilikti polıtsııa qyzmetiniń jedel toptary eldi mekender men saıajaılarǵa apta saıyn patrýldeý jumystaryn júrgizýde», - dedi M.Jumaǵalıev.
Oblys kóleminde órt 18 mamyr kúni de tirkeldi. Saǵat 11.13-te Syrym aýdany ortalyǵy Jympıty aýylynda Abaı kóshesi 1-úıdiń aýlasynda 2,5 tonna shóp janyp ketti.
Órt saǵat 14.30-da oqshaýlanyp, 14.50-de sóndirildi.
Eske sala keteıik, budan buryn Oralda órt sóndirýshiler janǵan garajdan gaz ballonyn shyǵaryp úlgergenin jazǵan bolatynbyz.
