BQO-da Oral temirjol vokzalyn jańǵyrtý jumystary 95%-ǵa aıaqtaldy
ASTANA.KAZINFORM — QR Premer-mınıstriniń birinshi orynbasary Nurlybek Nálibaev Batys Qazaqstan oblysyna jumys sapary barysynda birqatar ınfraqurylymdyq jáne áleýmettik nysandardyń qurylys barysymen tanysty. Bul týraly Úkimaettiń baspasóz qyzmeti málim etti.
Memleket basshysy Qasym-Jomart Toqaevtyń temirjol ınfraqurylymdaryn damytý jónindegi tapsyrmasyna sáıkes qolǵa alynǵan mańyzdy joba — Oral temirjol vokzalyn jańǵyrtý jumystary 95%-ǵa oryndaldy. QR Premer-mınıstriniń birinshi orynbasary Nurlybek Nálibaev óńirge jumys sapary aıasynda qurylys alańynda bolyp, jumys barysyn qadaǵalady.
— Joba sheńberinde strategııalyq nysanda zamanaýı kútý zaldary jasaqtalyp, jańartylǵan aqparattyq jáne navıgatsııalyq júıeler iske qosyldy. Basty mindet — jolaýshylar úshin qaýipsiz ári qolaıly jaǵdaı jasaý. Bekette 4 eskalator, 3 jedelsaty ornatylyp, jaıaý júrginshiler ótkeli salyndy. Vokzaldan perronǵa burynǵydaı jertóle arqyly emes, tikeleı shyǵý múmkindigi qarastyryldy. Vokzalǵa tartylǵan ınjenerlik ınfraqurylym tolyq jańartyldy. Jergilikti bıýdjet esebinen nysanǵa irgeles aýmaqtar da retteledi, — delingen habarlamada.
Nurlybek Nálibaev merdiger kompanııa men ózge de jaýapty tulǵalarǵa qurylys sapasy birinshi kezektegi másele ekenin eskertip, ana men balaǵa, múgedektigi bar adamdarǵa qolaıly jaǵdaı jasaýǵa basa mán berýdi tapsyrdy.
Aıta keteıik, budan bólek Shyńǵyrlaý aýdanynda temirjol vokzaly jańadan salynyp, Bórli, Tasqala aýdandaryndaǵy 2 beketti kúrdeli jóndeý jumystary aıaqtalady.
Sonymen qatar Premer-mınıstrdiń birinshi orynbasary jumys sapary aıasynda Jaıyq ózeni arqyly ótetin jańa kópirdiń jobasymen tanysty. Memleket basshysynyń tapsyrmasyna sáıkes, qolǵa alynǵan bul jobanyń jalpy quny — 71 mlrd teńge. Tehnıkalyq tekserýden keıin apattyq dep tanylǵan eski kópirlerdiń janynan boı kóteretin bul nysan halyqaralyq mańyzy bar «Aqtóbe — Oral — RF shekarasy» avtojolynyń boıynda ornalasqan jáne óńirdegi jol qaýipsizdigin qamtamasyz etýdegi ózekti suranysqa negizdelgen.
— Joba aıasynda jalpy uzyndyǵy 8 shaqyrymdy quraıtyn jol men zamanaýı monolıtti qurylymdaǵy 513 metr arnalyq jáne 1710 metr jaıylmalyq qos kópir salý qarastyrylǵan. Qazirgi ýaqytta jobanyń tehnıkalyq-ekonomıkalyq negizdemesi ázirlenip, tıisti organdardyń kelisiminen ótti. Infraqurylymdyq nysannyń jobasynda qarastyrylǵan jańa tehnologııalar men ınjenerlik sheshimder jol qatynasynyń senimdiligin arttyrýǵa baǵyttalǵan, — delingen Úkimettiń habarlamasynda.
Nurlybek Nálibaev jaýapty mınıstrlikter men oblys ákimdigine jobany memlekettik saraptamadan ótkizý protsesin jyldamdatýdy júktep, jobany júzege asyrý kezinde bıýdjetti barynsha ońtaılandyrý, shyǵyndardy tıimdi bólý jáne sonymen birge nysannyń sapalyq kórsetkishterine erekshe basymdyq berýdi qatań tapsyrdy. Ol bul kópirdiń Qazaqstan men Reseı arasyndaǵy halyqaralyq logıstıkalyq baılanystardy nyǵaıtýdaǵy mańyzy joǵary ekenin atap ótti.
Óńirge jumys sapary aıasynda Nurlybek Nálibaev Aqjaıyq jańa shaǵyn aýdany qurylysynyń barysymen tanysty. Jalpy kólemi 420 gektardy quraıtyn jáne 50 myń turǵynǵa arnalǵan Aqjaıyq jańa shaǵyn aýdanynyń búginde 100 gektary belsendi ıgerilýde. Aýqymdy nysan Oral qalasyn damytýdyń keshendi jospary aıasynda boı kóterip jatyr. Qazirgi ýaqytta aýmaqtyń ortalyq pen ońtústik bólikterinde jumystar qarqyndy júrýde. Munda ınjenerlik jeliler tolyqtaı tartylyp, káriz sorǵy stansasy salyndy, sondaı-aq aýdannyń kólik qoljetimdiligin arttyrý maqsatynda jańa avtomobıl kópiriniń qurylysy bastaldy.
Premer-mınıstrdiń birinshi orynbasary nysan basynda jumys istep jatqan qurylys kompanııalarynyń ókilderimen tildesip, mundaı mańyzdy jobalardy júzege asyrýda jaýapty mindet júktelgen merdigerler eń aldymen jumys sapasyna jiti mán berýi kerektigin eskertip, nysandardy ýaqtyly aıaqtaý boıynsha naqty tapsyrmalar júktedi. Sonymen qatar Nurlybek Nálibaev turǵyndardy baspanamen qamtý baǵytyndaǵy memlekettik qoldaý sharalaryn baıandap ótti.
— Búgingi tańda shaǵyn aýdanda 1044 páterlik 10 úı men ońaltý ortalyǵy paıdalanýǵa berilgen. Qazirgi ýaqytta taǵy 16 turǵyn úıdiń qurylysy júrip jatyr jáne jyl sońyna deıin sonyń ishindegi 648 páterdi tapsyrý josparlanǵan. Aldaǵy ýaqytta bul aýmaqta 60 áleýmettik nysan boı kóteredi dep kútilýde, onyń ishinde 2 mektep, 4 balabaqsha, kópbeıindi aýrýhana, perınataldyq ortalyq jáne 12 myń oryndyq zamanaýı stadıon bar, — delingen habarlamada.
Sonymen qatar Premer-mınıstrdiń birinshi orynbasary «Kvant» JShS jıhaz zaýytyna bardy. Naryqta 35 jyldyq tarıhy bar kásiporyn qazirgi tańda joǵary deńgeıde avtomattandyrylǵan jáne eýropalyq ozyq tehnologııalarmen jaraqtanǵan. Munda 300-den astam adam eńbek etedi. Zaýyt quramynda porolon, matras, jumsaq jáne korpýstyq jıhaz shyǵaratyn 4 birdeı óndiris jelisi jumys istep tur. Kompanııa ónimderi Oral, Aqsaı jáne kórshiles Atyraý qalalaryndaǵy fırmalyq dúkenderde, sondaı-aq respýblıka kóleminde satylymǵa shyǵarylady. Búginde kásiporyn serpindi damyp keledi. Byltyr 2,5 mlrd teńgeden astam somaǵa ónim óndirilse, 2026 jyldyń alǵashqy tórt aıynda bul kórsetkish 654 mln teńgege jetken.
Premer-mınıstrdiń birinshi orynbasary zaýyt jumysymen, ondaǵy ózekti máselelermen tanysty. Kásiporyn buǵan deıin óndiristi keńeıtý men logıstıkalyq ortalyq salý úshin alynǵan nesıelerdi qaıtarý merzimin bir jylǵa shegerý týraly usynysyn jetkizdi. Nurlybek Nálibaev bul máseleni jaýapty memlekettik qurylymdarmen birlese otyryp qaraýdy tapsyrdy.
Buǵan deıin Premer-mınıstrdiń birinshi orynbasaryna Qarashyǵanaq ken orny men kommýnaldyq ınfraqurylym jobalary tanystyryldy.
