BQO-da Oral qalasy men aýdandar boıynsha 4,1 mlrd teńge ıgerilmeı qaldy

ORAL. KAZINFORM – Batys Qazaqstan oblysynda 2025 jyly óńir bıýdjetiniń ózindik kirister jospary 102 paıyzǵa nemese 4,8 mlrd teńgege artyq oryndaldy.

BQO qarjy basqarmasynyń basshysy Nurlan Esenǵalıevtiń málim etkenindeı, jergilikti bıýdjetke 239,7 mlrd teńge tústi.

Nurlan Muhıtulynyń sózine qaraǵanda, ótken jyldyń qorytyndysy boıynsha oblys bıýdjetiniń shyǵystary 617,2 mlrd teńgege (jospar – 628,5 mlrd) nemese 98,2 paıyzǵa ıgerildi. Igerilmegen qarajat kólemi – 11,3 mlrd teńge.

– Respýblıkalyq bıýdjetten beriletin nysanaly transfertter 99,6 paıyzǵa (jospar – 68,7 mlrd, naqty – 68,4 mlrd teńge) ıgerildi. Igerilmegeni – 279 mln. teńge. Atap aıtqanda, aǵymdaǵy transfertter boıynsha densaýlyq saqtaý uıymdaryn materıaldyq-tehnıkalyq jaraqtandyrýdan 155 mln teńge únemdeldi. Sondaı-aq halyqtyń áleýmettik osal toptary úshin kommýnaldyq turǵyn úı qoryna baspana satyp alýdan 7,7 mln teńge únemdeldi. Damý transfertteri boıynsha Terekti aýdany Podstepnyı aýyldyq okrýgi Toqpaı kentindegi az qabatty 20 alty páterli turǵyn úılerdiń aýmaǵyn abattandyrý qurylysy 24 mln teńgege túzetildi. Bókeı ordasy aýdany Bısen aýylynda kentishilik avtomobıl joldaryn salý boıynsha 88 mln teńgege túzetý jasaldy, - dedi basqarma basshysy.

Onyń aıtýynsha, sonymen qatar respýblıkalyq bıýdjet nesıeleriniń ıgerilýi 73,4 paıyz boldy. 4,8 mlrd teńge ıgerilmedi. Munyń sebebi – 4,7 mlrd teńge joǵary turǵan bıýdjetten túsken joq. Al 188 mln teńgege «Dıplommen aýylǵa» jobasy boıynsha mamandardan ótinimder bolmady.

– Oral qalasy men aýdandar boıynsha 4,1 mlrd teńge ıgerilmeı qaldy. Sonyń ishinde Oral qalasy ákimdigi – 2,8 mlrd teńge, Bórli aýdany – 537,9 mln teńge, Jańaqala – 187,2 mln teńge, Terekti – 180 mln teńge. Qalǵan aýdandar boıynsha 354 mln teńge ıgerilgen joq. Oblys bıýdjet shyǵystarynyń kórsetkishi 98,6 paıyz boldy, ıgerilmegeni – 7,6 mlrd teńge. Eń kóp qarajat ıgermegen bıýdjettik baǵdarlama ákimshilerin aıtsaq, oblystyq aýyl sharýashylyǵy basqarmasy – respýblıkalyq bıýdjetten qarjy túspeýine baılanysty 4,7 mlrd teńge. Qarjy basqarmasy – rezerv qarajaty bólinbegendikten, 1,6 mlrd teńge. Densaýlyq saqtaý basqarmasy – 709 mln teńge. 643,8 mln teńge qalǵan basqarmalar úlesinde, - dep qosty N.Esenǵalıev.

Eske sala keteıik, budan buryn BQO-da «Aýyl – el besigi» baǵdarlamasymen 95 aýyl qamtylǵanyn jazǵan edik.