BQO-da óńirdiń úzdik taýar óndirýshileri marapattaldy
ORAL. KAZINFORM — Oblys ákimi Narıman Tóreǵalıevtiń qatysýymen «Qazaqstannyń úzdik taýary — 2026» óńirlik kórme-baıqaýy ótti.
BQO ákiminiń baspasóz qyzmetiniń málimetinshe, maqsat — jergilikti taýar óndirýshilerdi qoldaý, ónim sapasyn arttyrý. Bıylǵy básekede 42 kásiporyn 3 atalym boıynsha baq synady.
20 jylǵa jýyq ýaqyt ishinde baıqaý otandyq óndirýshilerdi yntalandyryp, isin ilgeriletýge tyń serpin berip keledi. Bul joly da kórmege jergilikti kásiporyndardyń tamaq ónimderi, kúrdeli ónerkásiptik jáne turmystyq qural-jabdyqtar qoıyldy.
Saltanatty is-sharada sóz alǵan aımaq basshysy básekege qabiletti ónim shyǵaryp, sapaly qyzmet kórsetý elimizdiń órkendeýine naqty ispen úles qosý ekenin atap ótti.
— Myqty ári básekege qabiletti bıznes — memlekettiń basty tiregi. Óńirimiz ónerkásip ónimin óndirý kólemi jaǵynan elimizde tórtinshi oryndy ıelenip otyr. 2026 jyldyń alǵashqy 5 aıynda ónerkásip kólemi 1,7 trıllıon teńgege jetse, onyń ishinde óńdeý ónerkásibi turaqty ósim kórsetti. Jalpy, aımaqqa tartylǵan ınvestıtsııanyń 49%-y dál osy ónerkásip salasyna baǵyttalǵan. Prezıdent tapsyrmalary aıasynda bızneske qolaıly jaǵdaı jasaý, jergilikti taýar óndirýshilerdi qoldaý sharalary júıeli jalǵasa beredi, — dedi Narıman Tóreǵalıev.
Baıqaý qorytyndysynda «Óndiristik maqsattaǵy úzdik taýarlar» atalymy boıynsha «Batys Qazaqstan mashına jasaý kompanııasy» AQ, «Kondensat» AQ jáne «QazExpoCentre-Pipe» JShS, «Halyq tutynatyn úzdik taýarlar» atalymy boıynsha «Meko» JK, «Oqjetpes life» QB, «Imar» JK, «Úzdik azyq-túlik taýarlary» atalymy boıynsha «Jelaev astyq ónimderi kombınaty» AQ, «Qaz-aqbas» JShS, «Makanova» JK úzdik dep tanylyp, qarjylaı syılyqqa ıe boldy.
Aıta keteıik, jeńimpazdar kúzde Astana qalasynda ótetin respýblıkalyq kezeńde baq synaıdy.
