BQO-da ónim jetkizýshi balabaqshalarǵa maıdyń baǵasyn eki esege qymbat satqan

ORAL. KAZINFORM — Batys Qazaqstan oblysy boıynsha saýda jáne tutynýshylardyń quqyǵyn qorǵaý departamenti saýda qyzmetin retteý týraly zańnamanyń buzylǵanyn anyqtady.

Departament basshysy Elmıra Qımatova málim etkendeı, osy derek boıynsha ákimshilik is qozǵalyp, tıisti hattama toltyryldy.

Onyń sózine qaraǵanda, kásipkerlik nysan memlekettik satyp alý portalynda jasalǵan sharttar aıasynda oblystyń memlekettik mekemelerine áleýmettik mańyzy bar azyq-túlik taýarlaryn jetkizýdi júzege asyrǵan.

— Elektrondyq shot-faktýralarǵa jasalǵan taldaý nátıjesinde atalǵan JShS-niń 2025 jyldyń qarasha-jeltoqsan aılarynda Oral qalasyndaǵy balabaqshalarǵa sary maı (72,5 paıyz, 180 g) taýaryn jetkizgeni anyqtaldy. Bul rette taýardy kásipkerdiń satyp alý baǵasy 900 teńge bolsa, ótkizý baǵasy 2240 teńgege jetken. Osylaısha, zańnamaǵa sáıkes shekti saýda ústemesi 15 paıyzdan aspaýy tıis bolǵanymen, sary maı 148,8 paıyzben jetkizilgen. ıAǵnı eki esege asyp ketken, — dedi E.Qımatova. 

Departament basshysy osy oraıda myna máselege ekpin túsirdi.

— Barlyq jetkizýshiler mynadaı negizdi jeleý etedi, ıaǵnı olarǵa mundaı baǵamen tapsyrýshynyń ózi (memlekettik mekeme) shyǵady. Sonymen qatar kelisim-shartqa sáıkes jetkizý baǵasyn tómendetýge bolady. Muny balabaqshalar da, ónim jetkizýshiler de jasamaıdy. Balabaqshalar men aýrýhanalarǵa qatysty bulaı etýdiń etıkalyq jaǵyn sóz etip otyrǵan joqpyn. Tipti ótken jyly 200 teńgelik qaraqumyqtyń baǵasyn ónim jetkizýshiler 1 myń teńgege deıin aparǵan, — dedi ol.

Sonymen qatar áleýmettik mańyzy bar azyq-túlik taýarlaryn kóterme baǵamen jetkizýshilerdiń barlyǵy birdeı atalǵan normany saqtaı bermeıdi. Mysaly, kásipker bólshek saýdamen aınalysatyn nysandarǵa (úı janyndaǵy dúkenderge) áleýmettik mańyzy bar taýarǵa jatatyn «Iletsk tuzy» taýaryn 47 paıyz saýda ústemesimen jetkizgen. 

— Atalǵan jaǵdaı elektrondyq shot-faktýralarǵa júrgizilgen taldaý nátıjesinde belgili boldy. Taýardyń satyp alý baǵasy kelisine 68 teńgeden kelse, ol 100 teńgemen ótkizilgen. Osyǵan baılanysty jetkizýshi QR Ákimshilik quqyq buzýshylyq týraly kodeksiniń 204-4-babyna sáıkes ákimshilik jaýapkershilikke tartyldy, — dep qosty E.Qımatova.

Eske sala keteıik, budan buryn BQO-da saýda ústemesin asyra belgilegen 9 kásiporynyń jaýapqa tartylǵanyn jazǵan edik.