BQO-da ónim baǵasyn asyryp satqan kásipkerge aıyppul salyndy
ORAL. KAZINFORM — Oral qalasynda kásipkerdiń qııar men qyzanaqtyń baǵasyn shekti saýda ústemesinen asyryp satqany anyqtaldy.
Batys Qazaqstan oblysy boıynsha saýda jáne tutynýshylardyń quqyqtaryn qorǵaý departamentiniń basshysy Elmıra Qımatovanyń málim etkenindeı, 2025 jyldyń jeltoqsanynda Saýda jáne ıntegratsııa mınıstriniń buıryǵymen áleýmettik mańyzy bar azyq-túlik taýarlarynyń tizbesi 19-dan 31-ge deıin keńeıtildi.
Elmıra Nurqyzynyń sózine qaraǵanda, tizbege qııar, qyzanaq, alma, irimshik, qara shaı, qaımaq sekildi azyq-túlik ónimderi engizildi.
— Shetten ákelinetin, sondaı-aq jergilikti jylyjaıda ósiriletin ónimder bolsa da, qııar men qyzanaqtyń baǵasy qala tutynýshylarynyń kóńilinen únemi shyǵa bermeıdi. Kásipkerlik sýbektileri áleýmettik mańyzy bar azyq-túlik taýarlaryna qatysty shekti saýda ústemesin zańnamaǵa sáıkes 15 paıyzdan asyrmaýy tıis bolsa da, bul talapty bári birdeı saqtamaıdy, — deıdi Elmıra Qımatova.
Onyń aıtýynsha, departament naýryz aıynda Oral qalasynyń saýda jelilerine qııardyń 117,3-ten 236,9 paıyzǵa deıin, qyzanaqtyń 66,6 paıyz saýda ústemesimen túskendigin anyqtady.
Kásipkerdiń bul áreketi «Saýda qyzmetin retteý týraly» QR Zańynyń 9-babyna qaıshy keledi. Onda shekti saýda ústemesi ónim óndirýshiniń bosatý nemese kóterme saýda arqyly berýshiniń baǵasynan 15 paıyzdan aspaýy tıis ekendigi kórsetilgen.
— Osyǵan baılanysty departament kásipkerge qatysty ákimshilik is qozǵap, oǵan aıyppul salyndy, — dep qosty departament basshysy.
Eske sala keteıik, budan buryn BQO-da ónim jetkizýshiniń balabaaqshalarǵa maıdyń baǵasyn eki esege qymbat satqanyn jazǵan bolatynbyz.