BQO-da óndiristegi adam ólimi boıynsha eńbek ınspektsııasynyń aktisi zańsyz dep tanyldy

ORAL. KAZINFORM — BQO mamandandyrylǵan aýdanaralyq ákimshilik sotynda óndiristegi qaıǵyly jaǵdaıǵa baılanysty arnaıy tergeý aktisi men eńbek ınspektsııasynyń qorytyndysyn daýlaýǵa qatysty is qaraldy.

BQO sotynyń baspasóz qyzmetinen málim etkenindeı, oqıǵa jumysker R-nyń ólimine ákelip soqqan.

Іs materıaldaryna sáıkes, R. ótken jyly jaýapkershiligi shekteýli seriktestikke eńbek sharty boıynsha kran mashınısi bolyp jumysqa qabyldanǵan.

2025 jyldyń qańtar aıynda ol qyzmettik mindetterin atqarý kezinde bıiktikten qulap, aýyr jaraqat alyp, kóz jumdy.

Arnaıy tergeý jazataıym oqıǵaǵa baılanysty jumys berýshiniń kinási 40 paıyz, al qyzmetkerdiń kinási 60 paıyz dep tapty. Keıin Batys Qazaqstan oblysynyń bas memlekettik eńbek ınspektory jaýapkershilik koeffıtsıentin 50/50 dep ózgertti.

Mundaı sheshimmen kelispegen marqumnyń týystary sotqa júginip, jaýapkershilikti 90 paıyz – jumys berýshige, 10 paıyzyn jumyskerge júkteýdi suraǵan.

Sot talqylaýy barysynda anyqtalǵandaı, jumys berýshi kran-manıpýlıatordy óndiristik ǵımarat ishinde paıdalanýǵa jol bergen. Alaıda bul jabdyq tar keńistikte jumys isteýge arnalmaǵan. Mundaı jaǵdaıda basqa qosymsha mehanızmder qoldanylýy tıis. Bul fakt kásiporynda eńbek qaýipsizdigi men eńbekti qorǵaý boıynsha ishki baqylaýdyń jetkiliksizdigin kórsetedi.

Sonymen qatar oqıǵa ornynda jumyskerdiń jeke qorǵanys quraldaryn paıdalanýyna tıisti baqylaý bolmaǵany anyqtaldy. Jumys berýshi bıiktikte jumys isteýge ruqsat rásimdemegen, jaýapty basshyny taǵaıyndamaǵan jáne maqsatty nusqama ótkizbegen. Al jumysshynyń ózi bas kıim men qaýipsizdik beldigin paıdalanbaǵandyqtan, qazaǵa ushyraǵan.

Sot otyrysynda arnaıy tergeý aktisi, eńbek ınspektsııasynyń qorytyndysy, saraptama materıaldary men kýágerlerdiń aıǵaqtary zertteldi. Tergeý barysynda jumys berýshiniń eńbek qaýipsizdigi talaptaryn óreskel buzǵany jáne oqıǵa ornynda qaýipsizdik tehnıkasyna jaýapty laýazymdy tulǵalardyń bolmaǵany anyqtaldy.

Barlyq dáleldemelerdi zerttep, zańnama normalaryna súıene otyryp, sot talap aryzdy ishinara qanaǵattandyrdy. Arnaıy tergeý aktisiniń 6.2-tarmaǵy men qorytyndynyń qararlyq bólimindegi 1-tarmaq zańsyz dep tanylyp, kúshi joıyldy.

- Jaýapker QR Eńbek jáne halyqty áleýmettik qorǵaý mınıstrligi Eńbek komıtetiniń BQO boıynsha departamenti esep pen qorytyndyǵa jumys berýshiniń kinásiniń dárejesin 70 paıyz, al qyzmetkerdikin 30 paıyz mólsherinde belgileıtin túzetýler engizýge mindetti. Bul sheshim eńbek qatynastary salasyndaǵy zańdylyqty qamtamasyz etýge, jumys berýshilerge eńbek qaýipsizdigi talaptaryn qatań saqtaý qajettigin eske salýǵa, sondaı-aq memlekettik organdar aktilerine sot baqylaýynyń mańyzyn aıqyndaýǵa baǵyttalǵan. Sheshim zańdy kúshine endi, - dep habarlady vedomstvodan.

Eske sala keteıik, budan buryn Batys Qazaqstanda óndiristegi jazataıym oqıǵadan 8 adamnyń zardap shekkenin jazǵan edik.