BQO-da on jobanyń altaýy eksportqa baǵyttalǵan

ORAL. QazAqparat - Batys Qazaqstan oblysynda Indýstrııalandyrý kartasynda  bıyl iske qosylǵan 10 jobanyń altaýy eksportqa baǵyttalǵan, dep habarlaıdy «QazAqparat» tilshisi.

Oblys ákimi Altaı Kólginovtiń aıtýynsha, jobalardyń jalpy quny 8 mlrd teńgeden asady. Sonyń  arqasynda 550 turaqty jumys orny ashyldy.

Elbasy tapsyrmasyna sáıkes óńirde eksportqa baǵyttalǵan ónim óndirýge, sonyń ishinde aýyl sharýashylyǵy baǵytyndaǵy óńdeý kásiporyndaryn ashýǵa barynsha kóńil bólinýde.

 

Osy jobalardyń biri - búgin Memleket basshysynyń qatysýymen ótken telekópir barysynda iske qosylǵan Zelenov aýdany Şapov aýylyndaǵy «Jaıyq Agro LTD» JShS-nyń qus fabrıkasy. Osy kezge deıin oblys jylyna 10 myń tonna qus etin, ıaǵnı ımporttyq ónimdi tutynyp keldi. Endi jańa kásiporynda jylyna 7 myń tonnaǵa deıin qus eti óndiriledi. Sonda qajettilikti jergilikti ónim esebinen óteýge bolady.

Ótken jyly syrtqy taýar aınalymy 4 mlrd AQSh dollaryn qurasa, sonyń 500 mln dollary Eýrazııalyq ekonomıkalyq odaqtyń úlesine tıedi. Bıylǵy segiz aıdaǵy eksport kólemi 10 paıyzǵa, eńbek ónimdiligi 3 paıyzǵa ósti. Bul Indýstrııalandyrý baǵdarlamasy óńir ekonomıkasyna oń serpin berip otyrǵanyn kórsetedi.

 

Eske sala keteıik, óńirdegi «Batys Marka Lamb» jáne «Kýbleı» JShS bıyldan bastap Iranǵa qoı etin jóneltip jatqany belgili.