BQO-da on kún ishinde avtobýs júrgizýshileri 869 ret tártip buzǵan
ORAL. QazAqparat - Qoǵamdyq kólikterdiń jol oqıǵalaryna ushyraýyn boldyrmaý maqsatynda elimizde 22 qańtardan beri «Avtobýs» keń aýqymdy jedel aldyn alý sharalary júrgizilýde, dep habarlaıdy «QazAqparat» tilshisi.
BQO ІІD jergilikti polıtsııa qyzmetinen túsken málimetke qaraǵanda, shara bastalǵannan beri qoǵamdyq kólik júrgizýshileri jol bergen 869 ákimshilik quqyqbuzýshylyq anyqtaldy. Sonyń ishinde 276 júrgizýshi burylý erejesin buzǵan. 267-si uıaly telefon qoldanǵan. 109-y jyldamdyqty shekten tys arttyrsa, 9-y jolaýshylardy jasyryn tasymaldaýǵa barǵan. Sondaı-aq 93 qoǵamdyq kóliktiń mindetti tehnıkalyq baıqaýdan ótpeı, jolaýshy tasymaldaýǵa shyqqany belgili boldy. Avtobýs parkteriniń 8 laýazymdy qyzmetkeri ákimshilik jaýapkershilikke tartyldy. Oǵan qosa kólik basqarý quqyǵy bolmasa da, avtobýs rýline otyrǵan júrgizýshi men sol avtoparktiń laýazymdy qyzmetkeri de jazasyz qalmady.
Eske sala keteıik, 1 aqpan kúni Oral-Jelaev jolynda avtobýs pen «MAZ» júk kóligi soqtyǵysyp, eki adam qaza taýyp, jeteýi aýrýhanaǵa jatqyzylǵan bolatyn. Osy oqıǵaǵa baılanysty oblys ákimi Altaı Kólginov BQO ishki ister departamentiniń basshylyǵyna jol qaýipsizdigine baqylaý ornatýdy kúsheıtip, avtoparktermen jumysty shıratýdy tapsyrǵan edi. 2 aqpannan beri óńirde «Qaýipsiz jol» jedel aldyn alý sharasy da ótkizilýde.
