BQO-da oqýshyny soqqyǵa jyqqan muǵalim sottaldy
ORAL. QazAqparat - Qaztalov aýdany Qaraoba aýylyndaǵy Ǵ.Qarash atyndaǵy mektep-gımnazııasynda alǵashqy áskerı daıyndyq pániniń muǵalimi bolǵan Aıdos Ǵabdolkárimov QR QK 106-baby 2-bólimi 11-tarmaǵyna sáıkes aıypty dep tanylyp, bes jylǵa bas bostandyǵynan aıyrý jazasyn jalpy tártiptegi kolonııada óteýge sottaldy. Bul týraly búgin úkimdi BQO kámeletke tolmaǵandar isteri jónindegi mamandandyrylǵan aýdanaralyq sotynyń tóraǵasy Telman Ibrashev málim etti, dep habarlaıdy «QazAqparat» HAA tilshisi.
Úkimge sáıkes buryn kepildikpen júrgen A.Ǵabdolkárimov sot zalynda tutqyndaldy.
Sot talqysynda belgili bolǵanyndaı, 2016 jylǵy 4 qazan kúni A.Ǵabdolkárimov keshki saǵat 21.00 shamasynda sport alańynda aýyl jastarymen fýtbol oınaǵan. Oıyn barysynda ol atalmysh mektep-gımnazııanyń 10-synyp oqýshysy Edil Maqsotovtyń sol jerge mas kúıinde kelip, oqıǵanyń týyndaýyna sebepshi bolǵan tarıh pániniń muǵalimi Raýan Qadeshevke balaǵat sózder aıtyp, alańnan ketip bara jatqanyn baıqaǵan.
Sol jerde A.Ǵabdolkárimov «Sen nege mektep muǵalimin balaǵat sózdermen boqtaısyń?!», dep E.Maqsotovtyń betinen urǵan. E.Maqsotov jerge qulap bara jatqan kezde eki butynyń ortasynan qasaqana tepken. Keıin 12 qazan kúni BQO kóp beıindi balalar aýrýhanasyna aýyr halde túsken E.Maqsotovqa ota jasalyp, soqqy saldarynan ezilip ketken oń jaq eni alynyp tastalǵan.
Sot úkimi zańdy kúshine engen joq.
Sottalýshynyń advokaty Nazgúl Kenjebaeva qylmystyń abaısyzda oryn alǵandyǵyn, 2 mln teńge materıaldyq jáne moraldyq zalaldyń orny toltyrylǵanyn alǵa tartyp, apellıatsııalyq shaǵym beretindikterin jarııa etti.
Eske sala keteıik, atalǵan oqıǵadan keıin eki muǵalim de jumystarynan shyǵyp ketken bolatyn.
