BQO-da oqýshydan koronavırýs anyqtalyp, mektep karantınge jabyldy
ORAL. QazAqparat – Batys Qazaqstan oblysynda oqýshydan koronavırýs anyqtalyp, mektep karantınge jabyldy, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti málim etkenindeı, oqıǵa Jánibek aýdany Kúıgenkól aýylynda boldy.
Osyndaǵy mekteptiń 11-synyp oqýshysynyń covid-19 juqtyrǵany belgili boldy. Odan indetpen aýyrǵan ákesimen qarym-qatynasta bolǵan adam retinde synama alynǵan.
Oqýshymen baılanysta bolǵan úı oshaǵyndaǵy eki adamnan alynǵan synama olarda koronavırýs joqtyǵyn kórsetti. Mekteptegi 13 adamnan synama alynyp, tekserilý ústinde.
Qorytyndy dezınfektsııa jasalǵan mektep karantınge jabyldy.
Jánibek aýdandyq aýrýhanasynyń bas dárigeri Sáýle Ismaǵulovanyń aıtýynsha, aýrý belgileri joq bolǵandyqtan, oqýshy ambýlatorlyq em alýda.
Qazirgi tańda aýrýhanada 25 tósektik juqpaly aýrýlar bólimshesi bolsa, onda 5 adam emdelýde. Sonyń bireýi – atalǵan balanyń anasy. Kórshiles Qaztalov aýdanynan ondaǵy aýrýhana kúrdeli jóndelip jatqandyqtan, bir adam osynda emdelip jatyr.
Jánibek aýdanynda indet bastalǵannan beri koronavırýs juqtyrǵandar sany 198-ge jetti.
Eske sala keteıik, budan buryn BQO-da 23 balanyń koronavırýs juqtyrǵanyn jazǵan bolatynbyz.
