BQO-da oqýshy órt kezinde qyraǵylyq kórsetip, eki adamdy alyp shyqty
ORAL. QazAqparat - Batys Qazaqstan oblysynda oqýshy turǵyn úıdegi órt kezinde qyraǵylyq kórsetip, eki adamdy alyp shyqty, dep habarlaıdy QazAqparat tilshisi.
Aqjaıyq aýdany Taıpaq aýyldyq okrýginiń ákimi Bolat Baıǵalıulynyń aıtýynsha, oqıǵa 22 aqpan kúni saǵat 17.30 shamasynda boldy.
Q.Baısyqov atyndaǵy mekteptiń 11-synybynda oqıtyn Mıras Júnisov sabaqtan kele jatqanda, kórshi úıdiń terezesinen jarq etken jalyndy baıqap qalady.
Úıdiń ishine kirgenmen, qara tútinnen eshteńe kórinbeıdi. Sosyn kórshi úıge baryp, órtpen kúres bólimine habarlaıyn dep qaıta shyqqanda, kishkentaı balanyń daýysy estiledi. Úıdiń ishine kirip, balany alyp shyǵady. Qorqyp qalǵan bala taǵy kim bar ekendigin aıta almaıdy. Sol mezgilde er adamnyń jótkiringen dybysy shyǵady. Onyń da syrtqa shyǵyp, kórshi úıge jetýine járdemdesedi. Sodan keıin oqıǵa jóninde órtpen kúres bólimine habarlanady.
Aýyl ákiminiń sózine qaraǵanda, ol úıde (eki páterlik úıdiń bir jaǵynda) turatyn Gúlnáz Jumahmetovanyń úsh uly bar. Úlkeni Temirlan Oraldaǵy Jáńgir han atyndaǵy Batys Qazaqstan agrarlyq-tehnıkalyq ýnıversıtetinde oqıdy. Ortanshysy Ǵanı Qaraǵandy qalasyndaǵy Á.Moldaǵulova atyndaǵy daryndy balalarǵa arnalǵan sport mektebiniń 9-synybynda.
Eń kishisi, 2011 jylǵy Ǵalym Q.Baısyqov atyndaǵy mekteptiń 1-synybynda bilim alýda. Sol kúni Gúlnázdiń úıine «Qadyr Amanjol» sharýa qojalyǵynda shopannyń kómekshisi bolyp jumys jasaıtyn 1965 jylǵy aǵasy Beıbit Demeýǵalıev kelgen. Órt tutanǵan kezde ol Ǵalym ekeýi demalyp, uıyqtap jatqan.
«Mıras Medetuly - oqý ozaty, «Altyn belgiden» úmitker. Geografııa páninen aýdandyq olımpıadanyń ekinshi oryn ıegeri, oblystyq «Erýdıt» baıqaýynyń júldegeri. Qoǵamdyq sharalarǵa belsene aralasady. Úlkenge qurmet, kishige izet kórsete biletin oqýshy», - deıdi Bolat Baıǵalıuly.
№18 órtpen kúres bóliminiń bólimshe komandıri Erkebulan Nuǵmanovtyń sózine qaraǵanda, Á.Moldaǵulova kóshesi boıyndaǵy №13/1 úıdegi órt aýmaǵy 51 sharshy metrdi qamtyǵan. «Tilsiz jaý» eki saǵat ishinde aýyzdyqtaldy. Kórshi páterdiń buryshy da janǵan.
«Qazirgi ýaqytta órtengen tórt bólmeli shaǵyn úı turýǵa jaramsyz bolyp qaldy. Degenmen aýyldaǵy mekemeler, kásipkerler, qarapaıym turǵyndar ýaqytsha basqa páterde turyp jatqan Gúlnázǵa zattaı, taǵamdaı kómektesýde. Qarjy da jınalýda», dedi QazAqparat tilshisine B.Baıǵalıuly.
