BQO-da oqýshynyń býllıngke ushyraýyna baılanysty qylmystyq is qozǵaldy

A.Tasjannyń málim etkenindeı, bıylǵy jylǵy kóktemnen bastap ulyn Atyraýdan otbasy jaǵdaıyna baılanysty Órken aýylyndaǵy mektep-bóbekjaı-balabaqsha keshenine aýystyrǵan.

Balasynyń aıtýynsha, mektepke aýysqan sátten, ıaǵnı 9-synyptyń úshinshi toqsanynan bastap aýyldaǵy keıbir oqýshylar tarapynan ony ortaǵa qabyldamaý, kemsitý jáne psıhologııalyq qysym kórsetý áreketteri bastalǵan. Sonyń ishinde aqsha talap etý, qorqytý da oryn alǵan. Jazda synyptastarymen birge aqsha jınap, ony 11-synyp oqýshysyna bergen. Bıylǵy oqý jyly bastalǵannan keıin qysym kúsheıe túsken. Basy, ishi, tamaǵy aýyratynyn aıtyp, sabaqqa barmaýǵa sebep izdedi.

- Balamnyń densaýlyǵyna alańdap, Oralǵa aparyp, birneshe ret medıtsınalyq tekserýden ótkizdim. 16-17 qyrkúıekte «dem jetpeıdi» dep shaǵymdanýyna baılanysty jedel járdem shaqyryldy. 17-23 qyrkúıek aralyǵynda aýrýhanaǵa jatyp shyqty. Balam sol kezde feldsherge qysym kórip júrgenin, sondyqtan mektep pen aýylǵa barǵysy kelmeıtinin jetkizgen. Osydan keıin ǵana onyń osynshama ýaqyt boıy qysymǵa ushyrap júrgenin, biraq maǵan aıtpaǵanyn bildim. Sonyń ishinde 3 qyrkúıek kúni aqsha bermegeni úshin ulyma 11-synyp oqýshysy kúsh qoldanyp, balaǵattaǵan. Qazirgi kezde QR QK 194-baby 2-bóligine sáıkes qylmystyq is qozǵalyp, tergeý amaldary júrgizilip jatyr, - deıdi A.Tasjan.

Qazirgi ýaqytta uly onlaın oqyp júr, oǵan psıhologtar kómek kórsetip jatyr.

Ananyń paıymdaýynsha, mektep ákimshiligi máseleni der kezinde anyqtap, kámeletke tolmaǵan balanyń qaýipsizdigin qamtamasyz etý, býllıngtiń aldyn alý jáne oǵan jol bermeý baǵytyndaǵy tıisti sharalardy ýaqytyly qabyldamaǵan. Sondyqtan mán-jaıdy tolyq anyqtaý úshin jan-jaqty tekserý júrgizý qajet dep esepteıdi.

Kazinform tilshisiniń saýalyna oraı BQO polıtsııa departamentiniń baspasóz qyzmeti atalǵan derek boıynsha qylmystyq is qozǵalǵanyn rastady.

- Osy qylmysty jasaýǵa qatysy bar barlyq adamdardan jaýap alynyp, qajetti tergeý áreketteri júrgizildi. Protsestik prokýrorlar taǵaıyndaldy. Tergeý jalǵasýda. Tergeý barysy Batys Qazaqstan oblysynyń prokýratýrasy men polıtsııa departamenti basshylyǵynyń baqylaýynda. QR Qylmystyq-protsestik kodeksiniń 201-babynyń talaptaryna sáıkes, ózge aqparat, onyń ishinde iske qatysy bar tulǵalar týraly málimetter jarııa etýge jatpaıdy, - delingen resmı jaýapta.

BQO bilim basqarmasy oqýshyǵa psıhologııalyq kómek kórsetý ortalyǵynyń psıhology tarapynan tıisti qoldaý kórsetilip jatqanyn, bul máseleniń baqylaýda ustalatynyn jetkizdi.

Eske sala keteıik, budan buryn Oralda qyzdy urǵan er adamǵa qatysty qylmystyq is qozǵalǵanyn jazǵan edik.