BQO-da oq jaraqatynan qaza tapqan turǵynnyń múrdesi tabyldy
BQO polıtsııa departamentiniń baspasóz qyzmetinen málim etkenindeı, oqıǵa 9 aqpan kúni Bókeı ordasy aýdany Han ordasy aýyldyq okrýgi aýmaǵynda boldy.
«Tańǵy saǵat 07.00 shamasynda Bozaı qystaǵynda 1989 jylǵy er adamnyń denesi tabyldy. Sol jaq bilegi men arqa tusynda oq jaraqaty bolǵan. Qabyldanǵan jedel is-sharalar nátıjesinde 1981 jylǵy er adam ustaldy. Qazirgi kezde QR QK 99-baby 1-bóligine (kisi óltirý) sáıkes sotqa deıingi tergeý amaldary júrgizilýde», dep habarlady vedomstvodan.
Aýyl turǵyndarynyń sózine qaraǵanda, ekeýi de sol qystaqqa mal baǵýǵa kórshiles Jánibek aýdanynan kelgen turǵyndar eken. Bir-birimen sózge kelip, kúdikti teris qarap otyrǵan ekinshisin atyp tastaǵan kórinedi.
Eske sala keteıik, budan buryn Oralda jantúrshigerlik jol-kólik oqıǵasyn jasaǵan júrgizýshiniń mas bolyp shyqqanyn jazǵan edik.