BQO-da ógeı qyzyna seksýaldyq sıpattaǵy zorlyq jasaǵan turǵyn 20 jylǵa sottaldy

ORAL. QazAqparat – BQO qylmystyq ister jónindegi mamandandyrylǵan aýdanaralyq sotynda ógeı qyzyna seksýaldyq sıpattaǵy zorlyq-zombylyq áreket jasaǵan turǵynǵa qatysty úkim shyqty, dep habarlaıdy QazAqparat tilshisi.

Atalmysh sottan málim etkenindeı, Oral qalasynyń P. degen turǵyny QR QK 121-baby 4-bóligine sáıkes aıypty dep tanylyp, 20 jylǵa bas bostandyǵynan aıyrý jazasyn qaýipsizdigi barynsha joǵary qylmystyq-atqarý júıesi mekemesinde óteýge sottaldy.

Ol sondaı-aq pedagogıkalyq jáne kámeletke tolmaǵandarmen jumys jasaýǵa baılanysty qyzmettermen aınalysý quqyǵynan ómir boıyna aıyryldy.

Sonymen qatar jábirlenýshiniń zańdy ókiliniń talap aryzy ishinara qanaǵattandyrylyp, sottalýshydan 7 mln teńge kóleminde moraldyq ótemaqy óndirildi.

Sotta anyqtalǵanyndaı, atalǵan turǵyn 2008 jylǵy ógeı qyzynyń dármensiz kúıin paıdalanyp, seksýaldyq sıpattaǵy zorlyq-zombylyq áreketterin jasaǵan.

P-nyń kinási jábirlenýshiniń jáne zańdy ókildiń, kýálardyń, sarapshylardyń aıǵaqtarymen, bettestirý, oqıǵa ornyn, zattar men qujattardy qaraý hattamalarymen jáne saraptama qorytyndylarymen dáleldengen.

Sot úkimi zańdy kúshine engen joq.

Eske sala keteıik, budan buryn Oralda jazasyn óteýshilerdi uryp-soqqan kolonııa qyzmetkerleriniń sottalǵanyn jazǵan bolatynbyz.