BQO-da ógeı ákeniń azǵyndyq áreketin jasyrǵan mektep dırektoryna úkim shyqty
Jańaqala aýdandyq sotynan túsken málimetke qaraǵanda, L.Qojahmetovaǵa 3 jylǵa bas bostandyǵyn shekteý jazasy belgilendi.
Sotta anyqtalǵanyndaı, 2019 jylǵy naýryzda Jańaqala aýdany mektep-gımnazııasynyń dırektory L.Qojahmetova mektep psıhologtary men 5 synyp oqýshysynan qyz balaǵa qatysty ógeı ákesiniń seksýaldyq sıpattaǵy is-áreketter jasaǵandyǵyn bilgen.
Sodan keıin L.Qojahmetova óz kabınetinde mektep qyzmetkerlerin jınap, jıyn ótkizgen. Sol jıynda Qojahmetova oqıǵany quqyq qorǵaý organdaryna habarlaýǵa tyıym salǵan, sondaı-aq oqýshynyń sheshesinen qyzyn basqa mektepke aýystyrýdy talap etken.
L.Qojahmetovanyń qylmystyq áreketsizdigi saldarynan qyz balaǵa qatysty seksýaldyq sıpattaǵy is-áreketter ógeı ákesimen eki márte jasalǵan.
Sottalýshynyń kinási kýálardyń bettestirý, júrgizý hattamalarymen dáleldenedi.
Osyǵan deıin zańdy kúshine engen sot úkimimen qyz balanyń ógeı ákesi seksýaldyq sıpattaǵy is-áreketter jasaǵany úshin 22 jylǵa bas bostandyǵynan aıyrylǵan bolatyn.
Prokýror L.Qojahmetovaǵa bas bostandyǵyn shekteý jazasyn taǵaıyndaýdy surady.
L.Qojahmetova kinásin moıyndaǵan joq.
Qylmystyq kodekstiń 434-babynyń sanktsııasymen aıyppul (6 myń AEK-ke deıin), túzeý jumystary, 6 jylǵa deıin bas bostandyǵyn shekteý nemese sol merzimge bas bostandyǵyn aıyrý jazasy kózdelgen. Zań boıynsha, eger qylmys úshin jazanyń birneshe túri kózdelgen bolsa, sot aldymen jazanyń jeńil túrin taǵaıyndaý múmkindigin qaraýy tıis. Bul jaza túrin taǵaıyndaýǵa negiz bolmaǵan jaǵdaıda ǵana neǵurlym qatań jaza túri taǵaıyndalady.
L.Qojahmetovanyń buryn qylmystyq jaýapkershilikke tartylmaǵanyn eskerip, sotta eń qatań jaza taǵaıyndaýǵa negiz bolǵan joq.
Eske sala keteıik, budan buryn seksýaldyq sıpattaǵy qylmysqa qatysty mektep dırektorynyń isi sotqa berilgenin jazǵan bolatynbyz.