BQO-da oblystyq mańyzy bar taǵy bir joldy sý basty
ORAL. QazAqparat - Batys Qazaqstan oblysynda taǵy bir joldyń ústine sý shyǵyp ketti, dep habarlaıdy QazAqparat tilshisi.
BQO TJ departamentinen alynǵan málimetke qaraǵanda, 5 sáýir kúni saǵat 17.20-da Terekti aýdany aýmaǵynda qardyń erýinen jáne sý ótkizetin qubyrdyń joqtyǵynan oblystyq mańyzy bar Fedorov-Aqsaı jolynyń 19-shaqyrymynda sý basqan. Onyń eni 3 metr de, tereńdigi - 3-5 sm.
«Jergilikti atqarýshy organdardyń kúshimen kezekshilik (4 jumysshy, 1 tehnıka) uıymdastyryldy. Joldyń jaı-kúıi qanaǵattanarlyq. Qozǵalys toqtatylǵan joq», dep habarlady TJ departamentinen.
Aıta keteıik, bul - oblystaǵy bıylǵy tórtinshi jaǵdaı. Buǵan deıin Bókeı ordasy, Qaratóbe, Qaztalov aýdandarynda joldy sý basqan edi.
Oǵan qosa «Qazgıdromet» RMK-nyń málimetine sáıkes 7-8 sáýirde kúnniń jylynyp, jaýyn-shashyn bolýyna baılanysty sý deńgeıiniń kóterilip, ózen sýlary jaıylýy múmkin ekendigi jóninde BQO TJ departamenti eskertý jarııalap otyr.
