BQO-da oblystyq joldarda 9 merdiger kútip ustaý jumystaryn júrgizedi
Batys Qazaqstanda oblystyq mańyzy bar 1 488 km avtomobıl jolyna 9 merdiger kútip ustaý jumystaryn júrgizedi, dep habarlaıdy Kazinform.
BQO jolaýshylar kóligi jáne avtomobıl joldary basqarmasynyń basshysy Baýyrjan Aıtmaǵambetovtiń óńirlik kommýnıkatsııalar qyzmeti alańynda ótken brıfıngide málim etkenindeı, 132 km jol ýchaskesine qaıta jańartý jumystary júrgizilip jatyr. Bul ýchaskeler boıynsha merdiger uıymdar qyzmet kórsetedi.
Baýyrjan Esqaıyrulynyń sózine qaraǵanda, 14 baǵyt boıynsha oblystyq joldardy kútip ustaý jóninde 2021-2023 jyldarǵa kelisimshart jasalǵan.
«Merdigerlermen jasalǵan kelisimshart merzimi bıylǵy 31 jeltoqsanda aıaqtalady. Osyǵan sáıkes qazirgi ýaqytta oblystyq joldardy 2024-2026 jyldary aǵymdaǵy jóndeý jáne kútip ustaý jumystary boıynsha konkýrstyq rásimder júrgizilip jatyr. Keıde joldardy ýaqytyly tegisteý jumystary júrgizilmeı qalǵan jaǵdaılar bolyp jatady. Ondaı kezde basqarma tarapynan jumysty tolyqqandy oryndaý jóninde eskertý beriledi. Merziminde oryndalmaǵan jaǵdaıda merdigerge aıyppul eseptelip, tipti kelisimshartty bir jaqty buzýǵa týra keledi», - deıdi B.Aıtmaǵambetov.
Basqarma málimeti boıynsha oblystyq joldardy kútip ustaýshy merdiger uıymdardyń ıeliginde 98 arnaıy tehnıka, 8 tirkemeli greıder jáne patrýldik jeńil avtokólikter bar. Qardan tazalaý jumystary kólik kóp júretin joldarda birinshi kezekte 2-4 saǵat aralyǵynda atqarylady. Barlyq avtomobıl joldary qar túskennen keıin 24 saǵat ishinde tazalanady. Sol sekildi respýblıkalyq mańyzy bar 1 032 km avtomobıl jolyn «KAJServıs» JShS BQO fılıaly kútip ustaıdy. Kúrdeli jóndeý qaralǵan 245 km jáne qaıta qurýdan ótip jatqan 72 km jol ýchaskesine merdiger uıymdar jaýapty.
Qysqy kezeńde «KAJServıs» JShS-dan 63 tehnıka qyzmet kórsetedi. Sonymen qatar avtokólikterdiń úzdiksiz jáne qaýipsiz ótýin qamtamasyz etý jáne qolaısyz aýa raıynyń aldyn alý maqsatynda basqa uıymdardan 12 jol-qurylys tehnıkasyn alýǵa kelisimshart jasalǵan.
«Kóktaıǵaqqa qarsy materıaldar daıyndaý – qysqy kútimniń ajyramas bóligi. Sondyqtan aldaǵy kezeńge respýblıkalyq joldarda 1 6200 tonna qum-tuz qospasyn ázirleý josparlansa, sonyń 7 550 tonnasy ákelingen. Qosymsha 1 375 tonna tuz jetkizilmekshi. Oǵan qosa oblystyq joldar úshin materıaldar tolyqtaı daıyn. Qys kezinde jolda kez kelgen jaǵdaı bolýy yqtımal. Respýblıkalyq jolda júrý múmkindigi qıyndasa, 1403 nómiri boıynsha call-ortalyqqa habarlasýǵa bolady. Sondaı-aq oblystyq jolda kólik buzylsa, júrgizýshi basqalaı jaǵdaıǵa tap kelse, +7 771 179 63 92 qońyraý shalýǵa nemese WhatsApp jelisine habarlama qaldyrýǵa bolady», - dedi B.Aıtmaǵambetov.
Eske sala keteıik, budan buryn Batys Qazaqstan oblysynda jol máselesi qashan sheshimin tabatynyn jazǵan bolatynbyz.