BQO-da nysandar men avtokólikti satýdan 200 mln teńge paıda tústi
ORAL. QazAqparat - Batys Qazaqstan oblysynda bıyl alty nysan 174,8 mln teńgege satyldy, dep habarlaıdy «QazAqparat» tilshisi.
BQO qarjy basqarmasynan túsken málimetke qaraǵanda, atap aıtqanda, «Jaıyq úni» JShS, «Pýls goroda» JShS, «Aqjaıyq» sport klýby» JShS, BQO ákimdigi densaýlyq saqtaý basqarmasyna qarasty «Oblystyq balalar stomatologııalyq aýrýhanasy» MKK, Oral qalasy ákimdigine qarasty «Jaıyq jaryǵy» JShS jáne Tasqala aýdany ákimdigine qarasty «Damý Tasqala» JShS óz ıelerin tapty.
Budan basqa 57 avtokólik 12,5 mln teńgege jáne «Aqjaıyq» shıpajaıy» JShS jarǵylyq qarjysyndaǵy memlekettik úlestiń 12,245 paıyzy 12,7 mln teńgege ótti.
Osylaısha, bıyl jekeshelendirý nátıjesinde bıýdjetke 200 mln teńge tústi.
Oǵan qosa eki nysan («Aqjaıyq» fýtbol klýby» JShS, Oral qalasy ákimdigine qarasty «Jaıyq Taza qala» JShS) boıynsha saýda qorytyndysy jeltoqsan aıynyń úshinshi onkúndiginde belgili bolmaq.
Aıta keteıik, 2017-2018 jyldary oblysta 13 kommýnaldyq menshik nysanyn básekelestik ortaǵa berý josparlanǵan bolatyn. Sonyń ishinde Bókeı ordasy aýdany ákimdigine qarasty «Orda» MKK satyp alý quqyǵymen senimgerlik basqarýǵa berildi. BQO ákimdigi densaýlyq saqtaý basqarmasyna qarasty «Oblystyq keńesshi-dıagnostıkalyq ortalyq» MKK-ny osyndaı basqarýǵa berý úshin tender rásimi ótkizilýde.
Syrym aýdany ákimdigine qarasty «Jympıty-servıs» JShS-nyń kerisinshe memlekettik menshigi saqtalmaqshy. Ony keshendi jekeshelendirý josparynan alyp tastaý jóninde Úkimet qaýlysy shyqpaqshy. Óıtkeni atalmysh seriktestik 2020 jylǵa deıingi óńirlerdi damytý baǵdarlamasy aıasynda turǵyn úı qoryn jańǵyrtýǵa qatysatyndyqtan, jekeshelendirýge jatpaıdy.
Budan basqa Oral qalasy ákimdigine qarasty «Ýralskgordorstroı» JShS taratylýǵa jatatyndyqtan, satylymnan alynyp tastaldy. 2018 jyly turǵyn úı-kommýnaldyq sharýashylyq salasynda taǵy bir nysan (Bórli aýdany ákimdigine qarasty «Gorkomhoz» MKK) taratylmaqshy.
