BQO-da «Nurly jol» baǵdarlamasyna sáıkes myńǵa jýyq páter nesıege berilmek
Bul jóninde Ortalyq kommýnıkatsııalar qyzmeti óńirlik fılıalynda málimet bergen «Qazaqstannyń turǵyn úı qurylys jınaq banki» AQ oblystyq fılıalynyń basshysy Aıgúl Naýryzalıevanyń aıtýynsha, ótken jyldyń 17 qazanynda BQO ákimdigi men «Qazaqstannyń turǵyn úı qurylys jınaq banki» AQ arasynda yntymaqtastyq týraly memorandýmǵa qol qoıylǵan bolatyn. Atalǵan baǵdarlama aıasynda «Qazaqstannyń turǵyn úı qurylys jınaq banki» AQ nesıelik turǵyn úı qurylysyn qolǵa aldy. Bul baǵyt jergilikti atqarýshy organ jáne «Báıterek Development» AQ jelisi arqyly júzege asyrylmaq. Oblysta bıyl nesıelik 7 turǵyn úı (985 páter) salynatyn bolsa, sonyń tórteýi (481 páter) jergilikti atqarýshy organ, qalǵan úsheýi (504 páter) «Báıterek Development» AQ arqyly beriledi. Jergilikti atqarýshy organ jelisi arqyly boı kóteretin tórt turǵyn úıdiń úsheýi Oralda, bireýi Aqsaı qalasynda salynbaq.
«Jergilikti atqarýshy organ jelisi arqyly salynǵan nesıelik turǵyn úılerdiń 50 paıyzdan kem emes bóligi kezekte turǵan ári «Qazaqstannyń turǵyn úı qurylys jınaq banki» AQ-nyń salymshylary bolyp tabylatyn turǵyndar arasynda bólinedi. Baǵdarlama shartyna sáıkes oblys ákimdigi toqsan saıyn bankke kezekte turǵan azamattardyń tizimin joldaıdy. Áıtse de tizimdegi aqparattar tolyq emes bolyp shyǵyp jatady. Sondyqtan kezekte turǵan azamattardyń ózderi turǵyn úı kommýnaldyq sharýashylyq bólimine jolyǵýy kerek. Jergilikti atqarýshy organ tiziminde kezekte turǵandardy tańdaý tártibi «Qazaqstannyń turǵyn úı qurylys jınaq banki» AQ-nyń baldyq júıesi arqyly anyqtalady jáne turǵyn úı nysandary, salymshylardyń pýlǵa ótinish berý jolymen, ıaǵnı daýys berýdiń qorytyndysynan keıin kelisiledi. Bank barlyq jergilikti atqarýshy organ tiziminde kezekte turǵan azamattarǵa, turǵyn úı qurylys jınaq týraly kelisim-shartty komıssııalyq alymsyz jasaıdy. Al «Báıterek Development» AQ arqyly nesıege beriletin turǵyn úıler túgeldeı bank salymshylary arasynda bólinedi. Joba banktiń ortalyq apparatyndaǵy turǵyn úı komıssııasynyń sheshimimen tańdalady», dedi A.Naýryzalıeva.
