BQO-da «Nurly jer» baǵdarlamasyna sáıkes qurylysqa 11 mlrd. teńge qaralyp otyr

ORAL. QazAqparat - Batys Qazaqstan oblysynda «Nurly jer» baǵdarlamasy boıynsha qurylysqa barlyq qarjylandyrý kózderinen (Ulttyq qordan - 9,5 mlrd., respýblıkalyq bıýdjetten - 300 mln., jergilikti qazynadan - 1,2 mlrd. ) 11 mlrd. astam teńge qaralyp otyr, dep habarlaıdy «QazAqparat» tilshisi.

Oblys ákimi Altaı Kólginovtiń aıtýynsha, sonyń 9 mlrd. teńgesi turǵyn úı qurylysyna, 2 mlrd. teńge ınjenerlik-kommýnıkatsııalyq ınfraqurylymǵa bólindi. Bıyl 280 myńnan astam sharshy metr turǵyn úı salý josparlanýda, bul ótken jylǵydan 3,5 paıyzǵa kóp bolmaq.

«Nurly jer» aıasynda Oralda 8 kóp qabatty, Aqsaı qalasynda 1 kóp qabatty (jalpy 1345 páter), 12 aýdannyń jeteýinde 178 turǵyn úı (240 páter) boı kótermek. Sonda barlyǵy 1585 otbasy baspanaly bolmaq. Sonymen qatar ınjenerlik-kommýnıkatsııalyq ınfraqurylymnyń 14 nysanynda qurylys jumystary júrgizilýde.

Bıyl toǵyz aýdanda ınjenerlik jeliler tartylǵan 3252 jer telimi jeke turǵyn úı salý úshin kezekte turǵandarǵa beriledi. Oǵan qosa Oral qalasy aýmaǵynda jeke sharýa qojalyǵynan aqpan aıynda 200 ga jer memleket menshigine qaıtaryldy. Bul jer telimderi de ınjenerlik jeli tartylǵan soń kezekte turǵandarǵa beriledi.

Aıta keteıik, oblys boıynsha úı kezeginde turǵan azamattardyń sany 22 myńnan asty. Sonyń ishinde Oral qalasynda budan tórt jyl 13 myń adam kezekte tursa, qazir 19 myńǵa jetti. Óńirde jer kezeginde turǵandar sany 97 myń, al turǵyn úı qurylys jınaq banki salymshylarynyń sany 40 myń bolyp otyr.