BQO-da naýryzda koronavırýsqa qarsy 1200-den astam adam egildi
ORAL. QazAqparat – Batys Qazaqstan oblysynda naýryzda koronavırýsqa qarsy 1210 adam egildi, dep habarlaıdy QazAqparat tilshisi.
BQO Densaýlyq saqtaý basqarmasynyń basshysy mindetin atqarýshy Arman Qalıbekovtiń aıtýynsha, sonyń ishinde 322-si – pedagogtar, 40-y – quqyq qorǵaý organdarynyń ókilderi.
Arman Talǵatulynyń sózine qaraǵanda, aqpan aıynda 1 myń medıtsına qyzmetkeri «Gam-KOVID-Vak» (Spýtnık V) vaktsınasynyń birinshi jáne ekinshi komponentimen egilgen bolatyn.
Naýryzdyń 4-inde oblysqa jetkizilgen 6500 dozamen (3250 doza – birinshi, 3250 doza – ekinshi komponent) adamdar keste boıynsha egilýde. Bul rette eń aldymen birinshi kezeńde ekpemen qamtylmaǵan medıtsına qyzmetkerleri, sondaı-aq pedagogtar men polıtseıler egiledi.
«Kún saıyn orta eseppen 200, bir aptada 1 myń adamdy egý josparlanyp otyr. Osylaısha ákelingen vaktsınanyń (3250 doza) birinshi komponentimen 5 sáýirge deıin egip bitirý kózdelýde. Oblystyq bilim basqarmasy, polıtsııa departamenti jáne basqa quqyq qorǵaý organdarynan túsken tizimder ekpe júrgizetin medıtsına mekemelerine jiberiledi. Vaktsınatsııa barysyna kún saıyn monıtorıng júrgizilip otyrylady», dedi A.Qalıbekov.
Oblys boıynsha 28 egý kabıneti 7 memlekettik qalalyq emhanada, 5 jeke mekemede, sondaı-aq 15 aýdandyq jáne 1 aýyldyq aýrýhanada jumys isteýde.
Eske sala keteıik, budan buryn BQO-da bir aptada 413 adamnan koronavırýs anyqtalǵanyn, indet juqtyrǵandardyń 57 paıyzdan astamy Oral turǵyndary ekendigin jazǵan bolatynbyz.
