BQO-da naýryzda 3 myńǵa jýyq adamdy koronavırýsqa qarsy egý kózdelip otyr
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda málim etkenindeı, oblysta indetke qarsy 27 egý orny bar.
Egý kabınetteri qajetti jabdyqtarmen, ekpeden keıin bolýy múmkin qolaısyz jaǵdaı kezinde shuǵyl kómek kórsetý algorıtmderimen qamtamasyz etilgen. Dezınfektsııalyq sterıldeý qaǵıdalary qatań saqtalady.
Barlyq ekpe oryndarynda tońazytqyshtar bar. Qosymsha 5 tońazytqysh jetkizilmekshi.
Muhamǵalı Qaıyrjanulynyń sózine qaraǵanda, vaktsınatsııanyń birinshi kezeńinde 1 myń adam ekpe aldy.
Sonyń ishinde 204 medıtsına qyzmetkeri ekinshi komponentpen egilip úlgerdi.
Osy kezge deıin óńirde 12844 adam dertke shaldyǵyp, 10355-i saýyǵyp shyqty. 199 adam kóz jumdy.
Bıyl 3623, 1 aqpannan beri 1786 adamnyń aýyrǵany tirkeldi. Aqpan aıynda naýqastarmen qarym-qatynasta bolǵan 2996 adam medıtsınalyq baqylaýǵa alyndy.
Sońǵy aptada (19-25 aqpan) aldyńǵymen salystyrǵanda, indet juqtyrýdyń 7 paıyzǵa (465-ten 432-ge) tómendegeni baıqalady.
Osy aıda koronavırýspen syrqattanǵandardyń 584-i (32,6 paıyzy) – jumys isteıtinder, 459-y (25,6 paıyzy) – zeınetkerler, 390-y (21,8 paıyzy) –jumyssyzdar.
«Oqý jyly bastalǵannan beri barlyǵy 465 oqýshydan indet tabyldy. Úshinshi toqsanda, ıaǵnı 11 qańtardan bastap dástúrli sıpatta oqıtyn 133, qashyqtan bilim alatyn 109, barlyǵy 242 shákirt aýyrdy. 11-25 aqpan aralyǵynda qala men aýdandardyń bas memlekettik sanıtar dárigerleriniń qaýlysyna sáıkes 6 mektep karantınge jabyldy», dedi M.Aryspaev.
Eske sala keteıik, budan buryn BQO-da Qarashyǵanaq kenishinde 41 adamnan koronavırýs anyqtalǵanyn jazǵan bolatynbyz.
