BQO-da Naýryz meıramy sáýir aıynyń sońyna deıin jalǵasatyn bolady
14 naýryz – Kórisý kúninen bastalǵan mereke oblys ortalyǵy Oral qalasy men barlyq aýdandaǵy túrli mádenı, sporttyq is-sharalarǵa ulasty.
Kún men tún teńeletin 22 naýryz kúni qalanyń 16 jerinde merekelik baǵdarlama qoıyldy.
Tuńǵysh Prezıdent alańynda kıiz úıler tigilip, kerneı qaǵylyp, «Samarqannyń kók tasy», «Naýryz – kóktem gúli», «Qydyr ata batasy», «Jer Ana meıirimi», «Balalar tartýy» jáne «Dostyq» taqyrybynda teatrlandyrylǵan kórinister sahnalandy. Naýryzǵa arnalǵan kontserttik baǵdarlama kórermender nazarynan tys qalǵan joq.
Sonymen qatar ulttyq taǵamdar (naýryz kóje, baýyrsaq) halyqqa usynylyp, qolóner sheberleriniń jármeńkesi de ótti.
Shahar jastary altybaqan aıasynda dombyramen án áýeletip, turǵyndardyń kóńilin kótere tústi. Al arnaıy uıymdastyrylǵan sport alańynda túrli ulttyq oıyndar (qazaq kúresi, arqan tartý, qol kúresi, asyq atý, t.b.) boıynsha saıystar ótip, jeńimpazdar marapattaldy.
Merekelik sharaǵa qatysqan oblys ákimi Ǵalı Esqalıev Aq Jaıyq jurtshylyǵyna izgi tilegin bildirdi.
«Ejelden Naýryz adam men tabıǵattyń jańarýy, jańa ómirdiń bastamasy retinde qabyldanǵan. Qystan aman shyqqanyna qýanǵan halqymyz bir-birimen qushaq jaıa kórisip, kóktem men jazǵa ilese, jaqsylyq keledi dep baǵamdaǵan. Osy uly mereke qarsańynda Memleket basshysy Qasym-Jomart Toqaev Qazaqstan halqyna «Jańa Qazaqstan: jańarý men jańǵyrý joly» atty Joldaýyn arnap, eldiń saıası reformasyna qatysty jańa mindetterdi belgilep berdi. Prezıdentimizdiń tyń bastamalaryn qoldap, jańa Qazaqstan qurýǵa bir kisideı jumylyp atsalysaıyq! Elimizdiń mereıin ósirip, ulttyq bolmysymyzdy aıshyqtaıtyn Naýryz merekesi ár otbasyna sheksiz shattyq pen baqyt, qut-bereke men molshylyq ákelsin!», dedi óńir basshysy.
Naýryz merekesi Batys Qazaqstan oblysynda sáýir aıynyń sońyna deıin jalǵasatyn bolady.
