BQO-da Nátıjeli jumyspen qamtý baǵdarlamasyn júzege asyrýǵa 3616,4 mln. teńge qaraldy
ORAL. QazAqparat - Elbasynyń tikeleı tapsyrmasyna sáıkes qolǵa alynǵan Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasyn júzege asyrý maqsatynda bıyl Batys Qazaqstan oblysyna 3616,4 mln. teńge bólindi, dep habarlaıdy «QazAqparat» tilshisi.
BQO jumyspen qamtýdy úılestirý jáne áleýmettik baǵdarlamalar basqarmasy halyqty jumyspen qamtý bóliminiń basshysy Anar Amantaevanyń sózine qaraǵanda, Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaýynda aıtylǵanyndaı, eńbek naryǵyn jańǵyrtý úshinshi keshendi mindet bolyp tabylady. Osyǵan oraı bıyldan júzege asyryla bastaǵan atalmysh baǵdarlamanyń basty maqsaty - halyqty nátıjeli jumyspen qamtý jáne azamattardy kásipkerlikke tartý.
Baǵdarlama aıasynda bıyl 4123 adamdy jumyspen qamtý sharalarymen qamtamasyz etý josparlansa, birinshi jartyjyldyqta 1815 adam qamtyldy.
Elbasy Joldaýy men «100 naqty qadam» Ult josparynda adamdardy eńbek naryǵyndaǵy suranysqa ıe jumysshy jáne kásiptik-tehnıkalyq mamandyqtar boıynsha oqytý mindeti qoıylǵany málim. Bul rette baǵdarlamanyń «Baǵdarlamaǵa qatysýshylardy tehnıkalyq jáne kásibı bilimmen jáne qysqa merzimdi kásiptik oqýmen qamtamasyz etý» 1-baǵyty boıynsha 800 adamdy oqytý josparlanýda. Qazirgi tańda tehnıkalyq jáne kásiptik bilimi bar kadrlardy daıarlaý boıynsha 183 mobıldik top qurylyp, oqýǵa joldanatyn adamdardyń tizimderi jasaqtalýda. Oqytý bıylǵy 1 qyrkúıekten bastalatyn bolady. Sonymen qatar jumysshy kadrlardy eńbek naryǵynda suranysqa ıe mamandyqtar boıynsha qysqa merzimdi kásiptik oqytý boıynsha 1077 adamdy qysqa merzimdi kýrstarǵa jiberý kózdelýde. Alty aıda eńbek naryǵyndaǵy suranysqa ıe túrli mamandyqtar boıynsha 811 adam qysqa merzimdi kýrstarǵa joldandy.
Baǵdarlamanyń «Jappaı kásipkerlikti damytý» 2-baǵyty aıasynda nesıe berý arqyly shaǵyn jáne orta kásipkerlikti damytý qarastyrylǵan. Elbasy bıylǵy Joldaýynda shaǵyn nesıe berý aıasyn keńeıtip, kásipkerlerge kepildik jasaý jáne qyzmet kórsetý tetikterin belsendi paıdalaný, sonymen qatar jappaı kásipkerlikti qoldaý tetikterin odan ári jetildirý kerektigin atap kórsetken bolatyn. Sondyqtan oblys kóleminde 374 adamǵa (sonyń 300-i aýyldyq jerde, 74-i qalada) nesıe berý, 72 adamnyń nesıesine kepildik berý oılastyrylýda. Bıylǵy 1 shildege deıin 29 adamǵa nesıe berildi.
Buǵan qosa «Bastaý Bıznes» jobasy boıynsha 937 adamdy kásipkerlik negizderine oqytý josparlanyp, qazirgi tańda oqytý kestesine sáıkes bes aýdanda (Aqjaıyq, Jańaqala, Zelenov, Qaztalov, Terekti) pılottyq rejımde oqytýdyń ekinshi kezeńi bastaldy. Birinshi jartyjyldyqta 296 adam kásipkerlik negizderin oqýǵa joldandy.
Baǵdarlamanyń «Halyqty jumyspen qamtýǵa járdemdesý jáne eńbek resýrstarynyń utqyrlyǵy arqyly eńbek naryǵyn damytý» 3-baǵyty aıasynda jumyssyzdardy jáne ózin-ózi jumyspen qamtyǵan adamdardy jumyspen qamtamasyz etýge járdemdesý qarastyrylýda. Atap aıtqanda, maqsatty topqa jatatyn adamdardy áleýmettik jumys oryndaryna, al joǵary oqý oryndaryn bitirgen túlekterdi alǵashqy tájirıbe jınaqtaý maqsatynda jastar tájirıbesine joldaý jáne jumyssyzdardy aqyly qoǵamdyq jumystarǵa tartý jumystary atqarylýda. Mysaly, 420 adamdy áleýmettik jumys oryndaryna joldaý josparlansa, ol qazirdiń ózinde 416 adam bolyp oryndaldy. Sol sekildi kózdelgen 515 jas mamannyń 263-i jastar tájirıbesine joldandy. Sondaı-aq aqyly qoǵamdyq jumystarǵa 6073 adamdy jiberý josparlansa, alty aıda 3871 adam tartyldy.
«Jańa baǵdarlamany júzege asyrý barysynda jyl sońyna qaraı jalpy jumyssyzdyq deńgeıi 5,0 paıyz (2017 jyldyń birinshi toqsanynda 5,0 paıyz), jastar arasyndaǵy jumyssyzdyq deńgeıi 4,0 paıyz (1 toqsanda 4,1 paıyz), áıelder arasyndaǵy jumyssyzdyq deńgeıi 5,4 paıyz (1 toqsanda 5,2 paıyz) bolady dep josparlanýda», dedi Anar Amantaıqyzy.
