BQO-da nárestelerdi telefon habarlamalary arqyly tirkeý qolǵa alyndy
BQO ákimdigi «Azamattarǵa arnalǵan Úkimet» memlekettik korporatsııasymen birlesip júzege asyryp jatqan «Smart sıtı» jobasy aıasynda jas bosanǵan analar perzenthanada-aq mgov mobıldik qosymshasy arqyly sábıin tirketýge múmkindik aldy.
Osyndaı qyzmetti paıdalanyp, qyzynyń týýy týraly kýáligin alǵan Álııa Kárimova halyqqa qyzmet kórsetý ortalyǵynyń qyzmetkerlerine rızashylyǵyn bildirdi. Munyń reti mynadaı, mobıldi qosymshaǵa tirkelgen jas anaǵa balasy dúnıege kelgennen keıin SMS habarlama kelip, onda quttyqtaýmen birge sábıdiń atyn tirketý úshin jiberý týraly usynys jazylady. Qalǵan málimetterdi tirkeýshi organ tıisti aqparattyq júıeler arqyly ózi alady. Qosymsha málimet kerek bolǵan jaǵdaıda ǵana qyzmet alýshydan suraıdy. Telefon habarlamasy arqyly balanyń týýy men onyń kútimine beriletin járdemaqyny alý úshin bank esepshotyn jiberýge bolady. Sondaı-aq balabaqsha kezegine tura alady.
Oblys ákimi apparaty basshysynyń orynbasary Rasýl Medetovtiń sózine qaraǵanda, Elbasynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýynyń segizinshi taraýynda «bir ótinish» qaǵıdaty boıynsha jekelegen memlekettik qyzmet kórsetýden keshendi qyzmetke kóshý, sondaı-aq onynshy taraýda «Smart sıtı» tujyrymdamasyn júzege asyrý qajettigi aıtylǵan. Bul baǵyttaǵy jumystar óńirde qolǵa alynyp otyr. «Smart sıtıge» qosa Oralda qala turǵyndaryna qolaıly bolýy jáne olardyń ýaqytyn únemdeý úshin «Aqyldy qala» tujyrymdamasy engizilýde.
Aıta keteıik, kúni búginge deıin 4 myńdaı áıel balasynyń dúnıege kelgeni jóninde quttyqtaý men olardy tirketý týraly usynys jazylǵan SMS habarlama alǵan. Degenmen olardyń árbir altynshysy ǵana mundaı múmkindikti paıdalanyp otyr.
