BQO-da munaı óndirýshi kompanııaǵa 2 mlrd astam teńge aıyppul salyndy
ORAL. KAZINFORM – «Qarashyǵanaq Petroleým Opereıtıng B.V.» Qazaqstan fılıalyna qatysty normadan tys emıssııalar deregi boıynsha jospardan tys tekseris júrgizildi.
BQO boıynsha ekologııa departamentinen málim etkenindeı, Batys Qazaqstan oblysy mamandandyrylǵan tabıǵat qorǵaý prokýratýrasynyń talaby boıynsha 2026 jylǵy 30 qańtardaǵy №5 tekserý taǵaıyndaý týraly aktisi negizinde 3-16 aqpan aralyǵynda tekseris ótkizilgen.
Tekseris nátıjesi boıynsha kompanııanyń 2024 jyly atmosferalyq aýaǵa belgilengen normadan artyq 13,84 tonna shyǵaryndylar jáne belgilengen normadan artyq 0,05134355 tonna sarqyndy sý tógindilerine jol bergendigi anyqtaldy.
- Atalǵan derekter boıynsha «KPO B.V.» kompanııasy Ekologııalyq kodekstiń 39, 106, 202 jáne 216 baptarynyń talaptaryn buzǵany úshin QR Ákimshilik quqyq buzýshylyq týraly kodeksiniń 328-babynyń 1 jáne 2 bólikterimen jalpy somasy 2 mlrd 077 mln 749,9 myń teńge mólsherinde aıyppul túrinde ákimshilik jaýapkershilikke tartyldy. Qazirgi ýaqytta aıyppuldy óndirip alý sharalary júrgizilip jatyr. Departament normatıvten tys shyǵaryndylar men tógindilerdiń sebepterine taldaý júrgizip, sondaı-aq normatıvten tys emıssııalardy boldyrmaýǵa baǵyttalǵan is-sharalardy ázirleýge nusqama berdi, - delingen resmı málimette.
Eske sala keteıik, budan buryn BQO-da kompanııanyń mal ólekseleri men qaldyqtaryn aýyl mańyna tógip jatqanyn jazǵan bolatynbyz.