BQO-da «Múldem tózbeýshilik» aıasynda 2 myńǵa jýyq quqyqbuzýshylyq tirkeldi
ORAL. QazAqparat - Batys Qazaqstan oblysynda 19-21 aqpan aralyǵynda ótkizilgen «Múldem tózbeýshilik» jedel aldyn alý sharasy barysynda 1918 ákimshilik quqyqbuzýshylyq tirkeldi, dep habarlaıdy «QazAqparat» tilshisi.
BQO ІІD jergilikti polıtsııa qyzmetinen túsken málimetke qaraǵanda, sonyń ishinde 245 adam qoǵamdyq oryndarda ishimdik ishkeni jáne mas kúıinde júrgeni úshin jaýapqa tartyldy. 178 adam qala men eldi mekenderdi abattandyrý erejesin buzsa, 165 adam usaq buzaqylyqqa barǵan. Sondaı-aq 78 adamnyń belgilenbegen oryndarda saýda jasaǵany, otbasy-turmystyq qarym-qatynas salasynda 66 quqyqbuzýshylyqtyń oryn alǵany anyqtaldy. Sol sekildi kámeletke tolmaǵandarǵa alkogol ónimderin satýdyń 8 deregi belgili boldy.
Osy oraıda Oral qalasy ákimdigi turǵyndarmen tyǵyz baılanys jasaý úshin Instagram jáne Telegram áleýmettik jelileri arqyly uıymdastyrǵan «Halyqtyq baqylaý» jobasy aıasyndaǵy jumystardy atap ótýge bolady. «Halyqtyq baqylaý» jobasy boıynsha turǵyndar jergilikti bılikti fotobeıne materıaldar arqyly aqparattandyryp, atalǵan máselelerdi sheshýge qatysady. Buǵan polıtsııa qyzmetkerleri de atsalysýda.
Bul baǵyttaǵy jumystar jalǵasatyn bolady.
