BQO-da Muhıt Meráliulynyń 180 jyldyǵyna arnalǵan respýblıkalyq ánshiler baıqaýy márege jetti
Saıys alty alashqa án ozdyrǵan sal Muhıttyń týǵan jeri – Qaratóbe aýdanynda ótti.
Eki kúnge sozylǵan, úsh kezeńnen turatyn baıqaýǵa Qazaqstannyń jeti oblysynan 17 úmitker qatysyp, baq synady.
Baıqaýdyń sharty boıynsha qatysýshylar alǵashqy kezeńde Muhıttyń keń tynysty týyndysyn jáne óz óńirinen shyqqan halyq kompozıtorlarynyń bir ánin oryndady.
Sodan keıin jerebe tartý arqyly dástúrli án mektepterinen bir týyndyny, óz qalaýy boıynsha halyq ánin shyrqady.
Sońǵy kezeńde úmitkerler Muhıttyń «Aınamkóz», «Pańkóılek» sekildi týyndylarynyń bireýin jáne óz qalaýymen bir ándi tyńdarman nazaryna usyndy.
«Qurmet» ordeniniń ıegeri, Ǵ.Qurmanǵalıev atyndaǵy oblystyq fılarmonııanyń solısi Qaırat Kákimov bastaǵan qazylar alqasynyń sheshimimen mańǵystaýlyq Nurym Asqanov bas júldeni jeńip aldy.
Pavlodarlyq Dáýrenbek Slamǵalıev birinshi, batysqazaqstandyq, Qaratóbe topyraǵynyń túlegi Nurshat Islamǵalıev pen atyraýlyq Baıbaqty Іdirbaı ekinshi, almatylyq Qaıratbek Bektursyn men taǵy bir atyraýlyq Fatıma Serikbaeva úshinshi orynǵa kóterildi.
Muhıt toıyna Almatydan belgili ánshi, Qazaqstannyń eńbek sińirgen qaıratkeri, «Daryn» memlekettik syılyǵynyń ıegeri Sáýle Janpeıisova da arnaıy keldi.
Barlyq qatysýshylarǵa kádesyılar berilip, jeńimpaz-júldegerler dıplomdarǵa qosa aqshalaı syılyqpen marapattaldy.
