BQO-da muǵalimnen para suraǵan mektep dırektoryna sot úkimi shyqty

ORAL. QazAqparat – Batys Qazaqstan oblysynda muǵalimdi jumysqa qabyldaý úshin para alǵan mektep dırektoryna úkim shyqty, dep habarlaıdy QazAqparat tilshisi.

BQO sotynyń baspasóz qyzmetinen túsken málimetke qaraǵanda, Terekti aýdandyq soty para alǵan mektep dırektoryna QR QK 366-baby 2-bóligine sáıkes úkim shyǵardy. Sottalýshyǵa paranyń 30 eselengen mólsherinde, ıaǵnı 9 mln teńge aıyppul salyndy.

Sonymen qatar ol ómir boıyna memlekettik qyzmetti atqarý quqyǵynan aıyryldy.

Sot talqysynda málim bolǵanyndaı, mektep dırektory pedagogty jumysqa qabyldaý úshin para talap etken. Alaıda ol qylmystyq is-áreketin aıaǵyna deıin jetkize almady. Para berýshi áıel tıisti organdarǵa júginip, mektep dırektory qylmys ústinde ustaldy.

Úkim zańdy kúshine engen joq.