BQO-da monopolıst mekemelerdiń baǵany negizsiz ósirgeni anyqtaldy
BQO prokýratýrasynyń baspasóz qyzmetinen túsken málimetke qaraǵanda, elektr qýaty jáne jylý baǵasy tómendedi. Mysaly, «Batys Qazaqstan elektr jelilerin taratý kompanııasy» AQ qyzmetinde ótken jyly 71,9 mln teńgege tarıf smetasynyń oryndalmaý faktileri anyqtaldy.
Osylaısha bul somany óteý úshin buryn elektr qýatynyń quny 5,47 teńge bolsa, 2018 jyldyń 1 tamyzy men 31 jeltoqsany aralyǵynda 1 kılovatt úshin 5,37 teńgege tústi. Sonymen qatar, 2019 jyldyń 1 qańtarynan bastap baǵa 5,01 teńgege deıin tómendeıdi dep josparlanyp otyr.
Sol sekildi «Jaıyqjylýqýat» AQ-nyń jylýmen qamtamasyz etý tarıfi 78,28 teńgege tómendedi.
Monopolıst mindetti tólemge jatatyn 49,2 mln teńgeni shyǵyndamaı, ony jylý qýatynyń baǵasyna qosqan. Sondyqtan tutynýshylarǵa atalǵan somany qaıtarý maqsatynda 1 Gkal úshin tarıf 5289,77 teńgeden 5211,49 teńgege tómendep, ol 2019 jylǵy 31 tamyzǵa deıin ózgermeıdi.
«Oǵan qosa, tekseristiń nátıjeleri «Aqsaıjylýqýat» MKK-men bekitilgen Aqsaı qalasynyń turǵyndary úshin jylý qýatyn paıdalaný qunyn 5452,95 teńgeden 5335,97 teńgege tómendetti. Bul jerde «Aqsaıjylýqýat» kásiporny tarıfke jeke uıymnyń 11,3 mln teńgege eseptegish qurylǵylardy qondyrý qyzmetin qosqan. Alaıda dál osy jumysty ózderi jasaı alady. Artyq soma 1 Gkal úshin tarıfti 116,98 teńgege tómendetý arqyly turǵyndarǵa qaıtarylatyn bolady», - dep habarlady BQO prokýratýrasy.
Eske sala keteıik, budan buryn Elbasy Qazaqstanda elektr qýatynyń qunyn tómendetýdi tapsyrǵan bolatyn.