BQO-da mıllıondardy jymqyrǵan dáriger sottaldy
ORAL. QazAqparat - Zelenov aýdandyq №2 sotynyń 18 qazandaǵy úkimimen oblystyq densaýlyq saqtaý basqarmasyna qarasty «Qaraǵaıly» oblystyq týberkýlezden emdeıtin shıpajaıdyń bas dárigeri Aıman Muqasheva QR QK 189-baby 4-bóligi 2-tarmaǵy, 361-baby 1-bóligi, 366-baby 1-bóligi, 190-baby 3-bóligi 2, 3-tarmaqtaryna sáıkes aıypty dep tanylyp, 58-baptyń 3-tarmaǵy qoldanyla otyryp, oǵan túpkilikti jaza - múlkin tárkileýmen birge 7 jylǵa bas bostandyǵynan aıyrý jazasyn jalpy tártiptegi túzetý kolonııasynda óteý belgilendi, dep habarlaıdy QazAqparat.
BQO sotynyń baspasóz qyzmetinen túsken málimetke qaraǵanda, ol sonymen qatar ómir boıyna memlekettik uıymdarda laýazymdy qyzmet atqarý quqyǵynan aıyryldy.
Sot talqysynda belgili bolǵanyndaı, A.Muqasheva qyzmet babyn paıdalana otyryp, 2013 jyldyń 1 qańtary men 2015 jyldyń 30 qyrkúıegi aralyǵynda asa iri kólemde qarjy qymqyrǵan. Atap aıtqanda, naýqastardyń medıtsınalyq kartalaryn jalǵan toltyrý, statsıonardaǵy tósek-kún sanyn jasandy kóbeıtý jolymen aýrýlar úshin tamaq pen dári-dármek alýǵa bólingen 26 mln. astam teńgeni ıemdengen.
Oǵan qosa sottalýshy qaraýyndaǵy qyzmetkerlerden jalaqylary qate aýdarylyp ketti degen jeleýmen sol aqshany ózine qaıta alyp otyrǵan. Sóıtip 2013 jyl men 2015 jylǵy qyrkúıek aralyǵynda oblystyq densaýlyq saqtaý basqarmasyna 4 358,5 myń teńge materıaldyq zalal keltirgen.
Munymen qoımaı, 2011 jyldan 2015 jyldyń qyrkúıegine deıin sanıtarlyq qyzmetker H-ny óz úıiniń qyzmetshisi retinde ustap, oǵan 4 386 525 teńge jalaqyny negizsiz tólegen.
Buǵan qosa óziniń kúıeýin kúzetshi retinde qyzmetke alý týraly buıryq shyǵarǵan, al ol jalaqy alǵanmen, shyn mánisinde bul jumysty atqarmaǵan.
Sonymen qatar medbıke T. men sanıtarlyq qyzmetker S.-dan jumys ýaqyty kezinde araq ishkeni úshin jumystan qýmaımyn dep, olardyń árqaısysynan 15 myń teńgeden para alǵan.
Aqyry 2015 jyldyń qyrkúıeginde sý sorǵysyn alýǵa qajet dep, qaraýyndaǵy qyzmetkerlerden qarjy jınap, 110 myń teńgeni óz qajetine jumsaǵan.
Aıta keteıik, sot úkimi zańdy kúshine engen joq.
