BQO-da meıramhanaǵa shabýyl jasap, 4 mln astam teńgeni qoldy etkender ustaldy
ORAL. QazAqparat – Aqsaı qalasynda meıramhanaǵa qaraqshylyq shabýyl jasap, 4 mln astam teńgeni qoldy etkender ustaldy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa 4 aqpan kúni oryn aldy.
Saǵat shamamen 03.25-te Bórli aýdany polıtsııa bólimine «Altyn shatyr» meıramhana keshenine qaraqshylyq shabýyl jasalǵany jóninde habar túsken.
Oqıǵa ornyna jedel tergeý toby jetip, qylmysty ashýǵa jeke quram jumyldyryldy.
Keıin anyqtalǵanyndaı, betperde kıgen belgisiz ekeý 1963 jylǵy kúzetshini baltamen qorqytyp, meıramhany ashqyzǵan. Sodan keıin kúzetshiniń aıaq-qolyn baılap, óziniń ornynda qaldyrǵan. Ózderi kassa turǵan jerden 2 metall seıfti jymqyryp ketken. Onda 1990 jylǵy kásipkerge tıesili 4 mln astam teńge men qujattar bolǵan.
Kúzetshi aıaq-qolyn bosatyp, meıramhana kesheniniń menedjerine habar bergen. Ol polıtsııaǵa júgingen.
Jedel izdestirý sharalary barysynda osy qylmysqa qatysy bar tórt kúdikti qolǵa tústi. Olar Aqsaı qalasynyń 1989 jáne 1990 jylǵy turǵyndary bolyp shyqty. Bulardan urlanǵan aqsha men qylmys qarýy tárkilendi. Ustaý kezinde kúdiktilerdiń aqshany ózara bólisip úlgergeni anyqtaldy. Olar seıfti qaıda laqtyryp ketkendikterin de kórsetti. Zattaı aıǵaqtar tárkilenip, qylmystyq iske tirkeldi.
Urlanǵan qarjy túgeldeı ıesine qaıtaryldy.
Sondaı-aq atalǵan toptyń reseılik eseptegi «VAZ-21150» avtokóligimen júrgeni belgili boldy.
Qazirgi kezde QR QK 192-baby 3-bóligine (qaraqshylyq) sáıkes sotqa deıingi tergeý amaldary júrgizilýde.
Kúdiktilerdiń ekeýi Bórli aýdany polıtsııa bóliminiń ýaqytsha ustaý ızolıatoryna qamaldy.
Barlyq kúdiktilerge qatysty bultartpaý sharasyn qoldaný máselesi sheshilýde.
