BQO-da «Meıirimdi kóktem» jobasy qolǵa alyndy
ORAL. QazAqparat - Búgin Batys Qazaqstan oblysynda Alǵys aıtý kúni keńinen atap ótildi, dep habarlaıdy «QazAqparat» HAA tilshisi.
Oblys ákimi Altaı Kólginov bastaǵan Aq Jaıyq jurtshylyǵy aldymen káris etnomádenı birlestigi ornatqan «Qazaq halqyna myń alǵys» monýmenti aldyna jınalyp, eskertkishke gúl shoqtaryn qoıdy. Qazaqstan zulmat jyldary jer aýdarylyp kelgen birqatar halyq ókilderin qushaq jaıyp, baýyryna basqan bolatyn. Sonyń biri - káris halqy. Osyǵan rızashylyq retinde 2014 jyly batysqazaqstandyq kárister atalmysh eskertkishti turǵyzǵan bolatyn.
Budan keıin Dostyq úıinde oblystyq qaıyrymdylyq qyzmeti úılestirý keńesiniń birinshi keńeıtilgen otyrysy ótkizildi.
Onda Altaı Kólginovtiń atap ótkenindeı, osymen ekinshi ret toılanyp otyrǵan atalmysh merekeniń Assambleıanyń qurylǵan kúnimen tuspa-tus kelýi tegin emes. Ótken ǵasyrdyń otyzynshy jáne qyrqynshy jyldary basyna qara bul tónip, atamekenderinen aıyrylǵan káris, sheshen-ıngýsh, nemis syndy ult ókilderine Qazaq eli pana boldy. Qazaqtyń qonaqjaılylyǵyn kórgen olar jańa mekenderine tez baýyr basyp, Qazaqstandy Otanym dep ketti. Búginde san ult ókilderi qazaq halqynyń tóńiregine toptasyp, elimizdiń odan ári órkendep, damýyna óz úlesterin qosýda. Bıylǵy bir erekshelik, kóktemniń alǵashqy kúninen bastap óńirde «Meıirimdi kóktem» jobasy qolǵa alyndy. Bul qaıyrymdylyq isine kásipkerler óz úlesin qosatyny anyq. Kásipkerliktiń keń qanat jaıýyna memleket jaǵdaı jasap otyrsa, kásipkerler de bıznestiń áleýmettik jaýapkershiligin umytqan emes. Sondyqtan osy baǵyttaǵy jumystardyń jalǵasatyny kúmánsiz. 
Jıynda qaıyrymdylyq qyzmeti boıynsha úılestirý keńesiniń erejesi, jumys jospary bekitilip, keńes basshylary saılandy. Jedel shtab ta qurylyp, «Meıirimdi kóktem» jobasyna qatysty óńir kásipkerlerine úndeý qabyldandy.
Alǵys aıtý kúnine oraı qaıyrymdylyq isterimen kózge túsip júrgen kásipkerler oblys ákiminiń alǵyshattarymen marapattaldy.
Merekelik shara Dostyq úıiniń aldynda oblys ártisteri qoıǵan kontsertke ulasty. 
