BQO-da «Meıirimdi kóktem» sharasy aıasynda 44 myńǵa jýyq adamǵa kómek kórsetildi

ORAL. QazAqparat - Batys Qazaqstan oblysynda bıyl alǵash ret qolǵa alynǵan «Meıirimdi kóktem» qaıyrymdylyq sharasy aıasynda 43675 adamǵa 18,5 mln teńge kómek kórsetildi. Oǵan qosa jergilikti bıýdjetten 119,3 mln teńge bólinip, aqshalaı, turmystyq tehnıka, basqalaı syılyq, azyq-túlik túrinde járdem berildi. Bul týraly búgin oblystyq qazaq drama teatrynda Qazaqstan halqy BQO assambleıasynyń HH sessııasynda aıtyldy, dep habarlaıdy «QazAqparat» tilshisi.

Onda oblys ákimi Altaı Kólginovtiń atap ótkenindeı, Nursultan Ábishuly Nazarbaevtyń Qazaqstan halqy Assambleıasynyń HHV sessııasynda rýhanı jańǵyrýǵa qatysty jańa tapsyrmalar júktegeni belgili. «Júıeli jańǵyrýdyń maqsattaryna jaýap bere alatyn qoǵamdyq sana-sezim qalyptastyrý kerek. Bul protseske memleket pen azamattyq qoǵam, bilim berý men áleýmettik sala, jeke bıznes pen mass-medıa, bári de tartylýy qajet», degen bolatyn Elbasy.  Mine, osy tapsyrma aıasynda óńirde qaıyrymdylyq boıynsha úılestirý keńesi qurylyp, izgilikti ister atqarylýda. Sondyqtan «Meıirimdi kóktem» qaıyrymdylyq sharalary tek kóktem aılarymen shektelmeı, jyl boıy jalǵasyn tabady. Osylaısha, jaqsylyqqa beıim adamdar kóbeıip, ortaq maqsat jolynda birikkender qatary molaıa túsetin bolady.

Sanany jańǵyrtý degenimiz - memlekettiń taǵdyryna beı-jaı qaramaıtyn paıym-parasaty mol, básekege qabiletti, tarıhı saýatty saralaý. Bolashaqqa barynsha qam jasaı biletin pragmatıkalyq oılaý júıesine ıe tulǵany qalyptastyrý. Bylaısha aıtqanda, eski ádis-tásilderden aryla otyryp, shynaıylyq pen pragmatızm aldaǵy onjyldyqtardyń uranyna aınalýy tıis. Bul rette óziniń mádenı-aǵartý jobalarymen oblystyq assambleıa kóptegen qyzmetterdi atqara alady. Sonyń biri - etnostar kúni. Bul - Batys Qazaqstanda turatyn ulttar ókilderiniń salt-dástúrin, mádenıeti men tilin damytý men baıytýdyń jarqyn kórinisi. Birlik pen kelisimge baǵyttalǵan bul joba aıasyn burynǵydan da keńeıte túsý qajet.

«Memleket basshysynyń rýhanı jańǵyrý jónindegi tapsyrmasyna sáıkes oblystyq assambleıa alty birdeı jobany qolǵa almaqshy. Іs-sharalar jospary bekitilip, jumys komıssııalary, bastamashyl toptar qurylady. Assambleıa júzege asyratyn mańyzdy jobanyń biri - «Qazaqstannyń 100 jańa esimi». Osyǵan oraı aýdandar men Oral qalasy ákimderi oblystyq assambleıaǵa naqty kómek kórsetýi kerek. Sol sekildi «Rýhanı jańǵyrý» baǵdarlamasy aıasynda ólketaný jumystaryn jandandyryp, ataqty túlekterdiń óz aýyldaryna qolushyn sozýyna qoldaý kórsetý qajet. «Týǵan jer» baǵdarlamasyn júzege asyrýda árkim ózinen bastap jańalyqqa qaraı umtylyp, ózgere bilýi tıis. Bári de óz aýlasyn taza ustaý, týǵan aýylynyń kórkeıýine úles qosý syndy qarapaıym qadamdardan bastalady. Sondyqtan «Úzdik eldi meken», «Úzdik úı», «Úzdik aýla», «Úzdik kóshe» sekildi jobalardy qaıta jandandyrýdyń artyqtyǵy joq. Mysaly, Zelenov aýdany Zelenyı aýylynda qazirgi kezde túrli qala, ózge elderde turatyn burynǵy túlekterdiń belgili bir kúni bas qosyp, týǵan jerine kómektesetin ıgi dástúri bar. Sol sebepti assambleıa Qazaqstannan tysqary jerlerde ómir súrip jatqan jerlestermen de baılanys ornatyp, jumys júrgizse, esh artyq emes. Ákimder osyndaı jobalar boıynsha bir aı merzimde óz usynystaryn berýi kerek. Sol sekildi oblystyq ólketaný qaýymdastyǵyn, óńir tabıǵatyn keńinen kórsetý maqsatynda arnaıy fotoekspedıtsııa qurý jáne Batys Qazaqstan oblysy kıeli jerleriniń kartasyn jasaqtaý qajet», - dedi Altaı Kólginov.

Sessııaǵa qatysýshylar da óz usynys-pikirlerin bildirip, oblystyq assambleıanyń damý tujyrymdamasy bekitildi.