BQO-da metrologııalyq baqylaý salasynda 4,1 mln. astam teńge aıyppul salyndy

ORAL. QazAqparat - Batys Qazaqstan oblysynda ótken jyly metrologııalyq baqylaý salasynda barlyǵy 56 iriktelgen tekserý júrgizilip, sonyń 21-i boıynsha zańbuzýshylyq anyqtaldy. Bul týraly Ortalyq kommýnıkatsııalar qyzmeti óńirlik fılıalynda QR Investıtsııalar jáne damý mınıstrligi Tehnıkalyq retteý jáne metrologııa komıteti BQO boıynsha departamenti basshysynyń mindetin atqarýshy Janahyn Tyǵynbaev málim etti, dep habarlaıdy «QazAqparat» HAA tilshisi.

Onyń aıtýynsha, zań buzýshylarǵa QR Ákimshilik quqyqbuzýshylyq kodeksi 419-babyna sáıkes 4,1 mln. astam teńge kóleminde ákimshilik aıyppul salyndy.

Sonymen qatar departament BQO ishki saıasat basqarmasymen birlese otyryp, 101 memlekettik mekemede memlekettik rámizderdiń QR ulttyq standarty talaptaryna sáıkestiligin tekserdi. Sonyń nátıjesinde 50-den astam mekemede talaptyń saqtalmaǵany belgili boldy. Bul negizinen memlekettik Týdyń túsi ońyp ketýine baılanysty.

Departament basshysynyń málim etkenindeı, 2017 jyldyń ekinshi jartyjyldyǵynan bastap «Baǵaly metaldar men asyl tastar týraly» QR Zańynyń 13-babyna sáıkes zergerlik jáne basqa da buıymdardy synamalaý tańbasynsyz, sondaı-aq ataýly tańba bederinsiz el aýmaǵyna ótkizýge jol berilmeıdi. Qabyldanǵan norma boıynsha taýardy aldyn ala saraptamadan ótkizbeı satýǵa tyıym salynady. Atalǵan talap oryndalmaǵan jaǵdaıda jeke tulǵalarǵa 50 aılyq eseptik kórsetkish (AEK), laýazymdy adamdarǵa, shaǵyn kásipkerlik nysandaryna 80 AEK, orta kásipkerlik nysandaryna 100 AEK, iri kásipkerlik nysandaryna 150 AEK mólsherinde aıyppul salynady. Sondaı-aq asyl tastardy, zergerlik jáne basqa da buıymdardy Qazaqstan Respýblıkasynyń aýmaǵyna ákelý jáne elden áketý kezinde zańnama buzylǵan jaǵdaıda QR Ákimshilik quqyqbuzýshylyq kodeksiniń 297-1-babymen 30 AEK-ten bastap 1000 AEK-ke deıin aıyppul salý qarastyrylǵan.