BQO-da metrologııalyq baqylaý boıynsha 3 mln teńgeden astam aıyppul salyndy

ORAL. QazAqparat - QR Investıtsııalar jáne damý mınıstrligi Tehnıkalyq retteý jáne metrologııa komıtetiniń BQO boıynsha departamenti metrologııalyq baqylaý salasynda bıylǵy toǵyz aıda QR Kásipkerlik kodeksine sáıkes ishinara 45 tekserý júrgizip, sonyń 17-si (38 paıyzy) boıynsha zańbuzýshylyqtardyń beti ashyldy.

Departament basshysy Saltanat Qameshevanyń Ortalyq kommýnıkatsııalar qyzmeti óńirlik fılıalynda málim etkenindeı, tekserý qorytyndylary boıynsha 16 zańdy tulǵaǵa QR Ákimshilik quqyqbuzýshylyq kodeksi 419-babyna sáıkes 3 mln 75,4 myń teńge aıyppul salyndy. Qoldanýǵa kelmeıtin 221 ólsheý quralyn paıdalanýdan alý týraly uıǵarymdar berildi.

Jalpy, mundaı tekserister sany jyl sanap azaıyp keledi. Mysaly, 2011 jyly  - 333, 2012 jyly - 216, 2013 jyly - 186, 2014 jyly - 60, 2015 jyly 35 tekserý bolǵan edi.

Bıylǵy bir ózgeris, ekinshi jartyjyldyqtan bastap «Baǵaly metaldar men asyl tastar týraly» QR Zańynyń 13-babyna sáıkes synamalaý tańbasynsyz, sondaı-aq ataýly tańba bederinsiz zergerlik jáne basqa buıymdardy ótkizýge jol berilmeıdi. Eger ondaı tańbalar bolmasa, zańsyz daıyndalǵan buıym bolyp esepteledi. QR Ákimshilik quqyqbuzýshylyq kodeksiniń 190-1-babyna sáıkes óndirýshi tańbalary bolmaǵan baǵaly buıymdardy ótkizgen jeke tulǵalarǵa - 50 AEK, laýazymdy adamdar men shaǵyn kásipkerlik nysandaryna - 80 AEK, orta kásipkerlik nysandaryna - 100 AEK, iri kásipkerlikke 150 AEK kóleminde aıyppul salynady. Sol sekildi asyl tastardy, zergerlik jáne basqa buıymdardy el aýmaǵyna ákelý jáne áketý kezinde jasalǵan zańbuzýshylyq úshin atalǵan kodekstiń 297-1-baby boıynsha 30 AEK-ten bastap 1 myń AEK-ke deıin aıyppul salý qarastyrylǵan.

«Departament ónimniń katalogtyq paraqtaryn tirkeýdi de júrgizedi, mundaǵy maqsat - qazaqstandyq ónimniń katalogyn qalyptastyrý jáne tutynýshylarǵa qoljetimdi bolýyn qamtamasyz etý. Departament qyzmetkerleri jyl basynan beri ónimniń sáıkestigin mindetti rastaý boıynsha 191 azamattyń ótinishterin qarastyrdy. Basqa da túsinik jumystary júrgizilýde», dedi S.Qamesheva.